ხორავას ქუჩაზე მომხდარი მკვლელობის საქმეზე შექმნილი კომისიის თავმჯდომარის, სერგი კაპანაძის განცხადებით, არის ძალიან ბევრი კითხვა, რომელზეც პასუხები არ ჩანს.
მისი თქმით, ეს ეხება როგორც ერთი მიმართულებით წაყვანილ გამოძიებას, ისე მომდევნო საგამოძიებო მოქმედებებს, რომელიც იქნა ან არ იქნა ჩატარებული.
მისივე თქმით, ამ პროცესის მიმართ არც ერთი ადამიანი არ იქნება იმუნიტეტის მქონე.
"კომისიამ მუშაობა უკვე დაიწყო, ჩვენ გავეცანით ყველა მასალას, რომელიც ჩვენთან შემოვიდა და ვიწყებთ ახსნა-განმარტებების მოსმენას. გვაქვს ძალიან ბევრი კითხვა და მე დარწმუნებული ვარ, ამ კითხვებზე პასუხების გაცემით ნათელი მოეფინება იმას, თუ რა მოხდა ხორავას ქუჩაზე და რატომ არ იქნა ბოლომდე მიყვანილი ეს საქმე. ამ კითხვებზე პასუხები არის უაღრესად მნოშვნელოვანი", - განაცხადა სერგი კაპანაძემ.
