საქართველოს სამდღიანი ოფიციალური ვიზიტით ლატვიის გარემოს დაცვის მინისტრი ბატონი რაიმონდს ვეჟონისი ეწვია, რომელიც გარემოს დაცვის მინისტრს გოგა ხაჩიძეს შეხვდა.
ოფიციალური ვიზიტის მიზანი ბუნებრივი რესურსების მართვაში ევროპული ინვესტიციების მოზიდვა და ჩვენი ქვეყნის, როგორც ბუნებრივი რესურსების, ისე საკანონმდებლო და მარეგულირებელი საკითხების გაცნობაა.
ლატვიის რესპუბლიკა ცნობილია, როგორც სატყეოს სფეროში ერთ-ერთი წარმატებული ქვეყანა და შეხვედრა კონკრეტული შეთანხმების მიღწევას ითვალისწინებს, რომელიც საქართველოში ტყის მართვის სფეროში კადრების გადამზადების პროგრამის შემუშავებასა და ლატვიის გამოცდილების გაზიარებას ითვალისწინებს.
ვიზიტის ფარგლებში ლატვიის დელეგაციისთვის აჭარის დაცული ტერიტორიების - კოლხეთის, მტირალას, კინტრიშის ეროვნული პარკების გაცნობა და კონკრეტული ტურების შეთავაზება იგეგმება, რაც მიზნად ისახავს სამომავლოდ ლატვიელი ტურისტების მოზიდვას და ეკო-ტურიზმის განვითარების ხელშეწყობას. ასევე, ლატვიის დელეგაცია აჭარის სანაპირო ზოლის ინფრასტრუქტურის განვითარებასა და შავი ზღვის წყლის ხარისხის კონტროლის სისტემას გაეცნობა.
ლატვიის დელეგაცია საქართველოდან 19 აგვისტოს გაემგზავრება.
