ხორავას ქუჩაზე მომხდარი მკვლელობის საქმესთან დაკავშირებით, მოწმეზე ზემოქმედბის ფაქტზე მიმდინარე გამოძიების ფარგლებში შსს-მ მერაბ მორჩაძე დააკავა. როგორც „ჯი-ეიჩ-ენისთვის“ გახდა ცნობილი, ის ბრალდებულ თენგიზ კალანდიას ოჯახის შეორეული ნათესავია.
მკვლელობის ძირითადი საქმიდან ცალკე გამოყოფილ საქმეზე ერთ-ერთი ბრალდებულის ადვოკატი, დარეჯან ბუცხრიკიძე „ჯი-ეიჩ-ენთან“ აცხადებს, რომ დღეს დაკავებულმა პირმა, მოწმე მიხეილ კალანდიაზე მოახდინა ზეწოლა.
„ზუსტ დეტალებს ვერ გეტყვით, მაგრამ დაახლოებით, ვიცი რომ მან ზეწოლა მოახდინა სწორედ იმ მოწმეზე, რომელმაც ჩვენება შეცვალა. ვგულისხმობ, მიშა კალანდიას. ის კალანდიების შორეული ნათესავია, ოჯახის ახლობელია. მას ამ ოჯახთან ხშირი, რეგულარული ურთიერთობა არ ჰქონია, უბრალოდ, კონკრეტულ საქმესთან დაკავშირებით დაუკავშირდა ამ ბიჭუნას და გადაუტრიალა ტვინი“, - აცხადებს ბუცხრიკიძე.
არსებული ინფორმაციით, ის სამართალდამცავია, თუმცა, ამასთან დაკავშირებით, ადვოკატი ინფორმციას არ ფლობს. აღნიშნულს შსს-ში არ ადასტურებენ.
ცნობისთვის, შსს-მ დღეს 1973 წელს დაბადებული მერაბ მორჩაძე დააკავა.
„ხორავას ქუჩაზე მომხდარი მკვლელობის საქმესთან დაკავშირებით მოწმეზე ზემოქმედების ფაქტზე მიმდინარე გამოძიების ფარგლებში მოპოვებული ახალი მტკიცებულებების გათვალისწინებით, მოსამართლის განჩინების საფუძველზე, სისხლის სამართლის კოდექსის 372-ე მუხლით დაკავებულია 1973 წელს დაბადებული მერაბ მორჩაძე.
მერაბ მორჩაძის დაკავება განხორციელდა მკვლელობის ძირითადი საქმიდან გამოყოფილი იმ სისხლის სამართლის საქმის ფარგლებში, რომელზეც გამოძიებას შინაგან საქმეთა სამინისტრო აწარმოებს“, – აღნიშნულია შსს-ს ინფორმაციაში.
სისხლის სამართლის კოდექსის 372-ე მუხლი მოწმეზე ზემოქმედებას გულისხმობს.
