ბუტა რობაქიძის საქმეზე ბრალდებულ ირაკლი ფირცხალავს ადვოკატმა, კობა კობახიძემ საქმიდან თავი აიცილა. როგორც კობახიძემ დღევანდელ სასამართლო სხდომაზე განაცხადა, მას ფირცხალავამ ჰონორარი არ გადაუხადა.
ბრალდებულმა ირაკლი ფირცხალავამ რამდენიმე დღე ითხოვა, რათა თანხა მოიძიოს და ახალი უფლებადამცველი აიყვანოს.
პროკურორი, გიორგი ოსაძე კი თვლის, რომ ადვოკატის აცილება პროცესის ხელოვნურად გაჭიანურებას ემსახურება.
„ფაქტობრივად, ბოლო მოწმე გვყავდა, მაგრამ მოულოდნელად ადვოკატმა თვითაცილება მოითხოვა. განაცხადა, რომ მიზეზი ჰონორარი იყო. ვიმედოვნებთ, პროცესი არ გაჭიანურდება. ბრალდებულმა თქვა, რომ ორშაბათს ახალ ადვოკატთან ექნება კომუნიკაცია, რომელიც შეისწავლის საქმის მასალებს“, - დასძენს ოსაძე.
სხდომა 15 ივნისს 11:00 საათისთვის გადაიდო.
ცნობისთვის, ბუტა რობაქიძის მკვლელობის საქმეზე შსს-ს ყოფილი მაღალჩინოსნების მხრიდან სამსახურეობრივი უფლებამოსილების გადამეტების ფაქტზე 6 პირი: გურამ დონაძე, ზაზა ბაქრაძე, ზურა მიქაძე, ლევან გვაზავა, ირაკლი ფირცხალავა და დავით იაშვილი არიან ბრალდებული.
ერთ-ერთი ბრალდებული, კრიმინალური პოლიციის ყოფილი უფროსი, ზაზა ბაქრაძე, რომელიც თბილისის საერთაშორისო აეროპორტში 28 თებერვალს დააკავეს, 30 მარტს, 5 000 ლარიანი გირაოს სანაცვლოდ სხდომათა დარბაზიდან გაათავისუფლეს.