გარემოს დაცვისა და ბუნებრივი რესურსების მინისტრმა გოგა ხაჩიძემ აჭარაში, სოფელ ჩაქვში მდინარე ჩაქვისწყალზე დასრულებული ნაპირსამაგრი სამუშაოები მოინახულა და ადგილობრივ მოსახლეობას შეხვდა.
„დაბა ჩაქვში საკმაოდ დიდი ნაპირსამაგრი სამუშაოები განხორციელდა, რის შემდეგაც ადგილოვბრივი მოსახლეობის დიდ ნაწილს შეუძლია მშვიდად იყოს. ასევე, ეს ნაპირსამაგრი საინტერესოა, რადგან გამოინახა ფორმა, საკმაოდ მცირე დანახარჯებით შესრულებულიყო ეფექტური სამუშაოები. იმის გამო, რომ ჩვენ არ გვაქვს დიდი ფინანსები, ვეძებთ ფორმებს, რომელიც უფრო მისაღები იქნება სხვადასხვა ტერიტორიისთვის. ამ მხრივ ძალიან საინტერესოა მდინარე ჩაქვისწყლის ნაპირსამაგრი სამუშაოები," განაცხადა გოგა ხაჩიძემ.
გარემოს დაცვის სამსახურის ინფორმაციით, ადიდებული მდინარე წლების განმავლობაში საფრთხეს უქმნიდა მოსახლეობის საცხოვრებელ სახლებს და იტბორებოდა საკარმიდამო ნაკვეთები. მდინარის მარჯვენა ნაპირზე აღდგენილია 190 მეტრმდე სიგრძის გაბიონი, რისთვისაც სახელმწიფო ბიუჯეტიდან ჯამში 186 000 ლარამდე დაიხარჯა. მდ. ჩაქვისწყლის ნაპირსამაგრ სამუშაოებზე დასაქმებული იყო ადგილობრივი მოსახლეობა.
გოგა ხაჩიძე მიმდინარე და დასრულებულ ნაპირსამაგრ სამუშაოებს საქართველოს მასშტაბით ეტაპობრივად მოინახულებს.
