"ზუსტად ორი წლის წინ რუსეთის სახელმწიფო სადაზვერვო სამმართველოს გენერალური შტაბისა და საჰაერო-სადესანტო ძალების სპეციალური პოლკის რამდენიმე ჯგუფი თბილისის შემოგარენში იდგა და მოსკოვიდან ბრძანებას ელოდა საქართველოს ლიდერის დასაკავებლად", _ წერს რუსული გამოცემა "არგუმენტი ნედელი".
"ჩვენ გვქონდა ინფორმაცია იმის შესახებ, თუ სად, როდის და რომელი დაცვის თანხლებით იქნება "ობიექტი". დასახული იყო ამოცანა შეძლებისდაგვარად ხელში ჩაგვეგდო იგი ან მისი ლიკვიდაცია მოგვეხდინა. ამასთან ერთად ჩატარებული უნდა ყოფილიყო კვალის არევის სამუშაოც, იმისათვის, რომ მომსპარიყო ყველა პირდაპირი დადასტურება იმისა, რომ ყოველივე ამის თანამონაწილე რუსი სამხედროები არიან", _ იხსენებს საჰაერო-სადესანტო ძალების სპეციალური ჯგუფის ოფიცერი - წერს "არგუმენტი ნედელი".

მისივე თქმით, რუსული ჯგუფები რომლებსაც საქართველოს პრეზიდენტი ლიკვიდაცია ჰქონდათ დავალებული განთავსებულნი იყვნენ კერძო სახლებში თბილისის შემოგარენში. მათ გამუდმებით ჰქონდათ ინფორმაცია მიხეილ სააკაშვილის გადაადგილების შესახებ.
"ბოლო მომენტში, როდესაც უკვე ყველაფერი მზად იყო დასახული ოპერაციის განსახორციელებლად - მოსკოვიდან მოვიდა ბრძანება "ოტსტავიტ!". ჯგუფები ბრძანებას დაემორჩილნენ, ფარულად ქალაქიდან გავიდნენ და თავიანთი მუდმივი დისლოკაციის ადგილზე დაბრუნდნენ - სახელმწიფო სადაზვერვო სამმართველოს გენერალური შტაბის წარმომადგენლები - სამხრეთ ოსეთში, ხოლო საჰაერო-სადესანტო ძალების სპეციალური ჯგუფის წარმომადგენლები _ აფხაზეთში არსებულ გუდაუთის სამხედრო ბაზაზე.

ამის შემდეგ სტატიაში ნათქვამია, რომ "ნურავის გააკვირვებს ის, რომ რუსი სამხედროები ფაქტობრივად შეეცადნენ სხვა სახელმწიფოს ლიდერის განადგურებას. ყველაზე დემოკრატიული სახელმწიფოების თანამედროვე ისტორია სავსეა ამგვარი მაგალითებით. მაგალითად _ ცენტრალურმა სადაზვერვო სამმართველომ რამდენიმე ათეული მცდელობა განახორციელა გაენადგურებინა კუბის ლიდერი _ ფიდელ კასტრო. ხოლო 1989 წელს აშშ-ს არმიამ ჩაატარა ოპერაცია "ჯასტ კოზი" (მართალი საქმე), რომლის ძირითადი მიზანი იყო პანამის პრეზიდენტის მანუელ ნორიეგას ხელში ჩაგდება და მისი აშშ-ში ჩაყვანა სასამართლოში გადაცემის მიზნით. რაც წარმატებით განხორციელდა კიდეც. პარალელურად აშშ-მ ქვეყნის ტერიტორიაზე თავისი სამხედრო ბაზების პრობლემა გადაწყვიტა. აღნიშნული შემთხვევების ყველაზე "ნათელი" მაგალითი - სადამ ჰუსეინის სიკვდილით დასჯაა.
ამას გარდა, სტატიაში ასევე საუბარია ჩეჩნეთის პრეზიდენტის ჯოჰარ დუდაევის მკვლელობაზე.

"იგივე მედესანტეებისა და რუსული დაზვერვის წარმომადგენელი სპეცდანიშნულების რაზმების მიერ იყო შეთავაზებული 1994 წელს რუსეთის პოლიტიკური ხელმძღვანელობისათვის ჩეჩნური საკითხის პრაქტიკულად უსისხლო გადაწყვეტა.
ჯოჰარ დუდაევის ირგვლივ ყოველთვის იყო ჩვენი აგენტები და ეს არავისთვის საიდუმლო არ არის. სწორედ მათ მიერ იყო შეთავაზებული ჩეჩნეთის პრეზიდენტის დეზინფორმირება მისი ოპონენტის რუსლან ლაბაზანოვის ტყვედ ჩაბარების შესახებ. დუდაევი აუცილებლად წავიდოდა იქ პირადად დიდი დაცვის თანხლებით. მისი განადგურება გზაზე იგეგმებოდა. სპეცდანიშნულების რაზმები უკვე მზად იყვნენ მოზდოკიდან დაძრულიყვნენ. მაგრამ ბოლო მომენტში გადაწყდა დუდაევი სახალხოდ დაესაჯათ და არა ჩუმად. შედეგი ყველასათვის ცნობილია", _ აცხადებს საჰაერო-სადესანტო ძალების სპეციალური ჯგუფის ოფიცერი.

"თუმცა დავბრუნდეთ საქართველოში _ თუკი ბოლომდე გულახდილი ვიქნები, სპეცდანიშნულების რაზმები არ იყვნენ ერთადერთნი, რომლებიც მზად იყვნენ რუსთაველის პროსპექტზე "გასასეირნებლად". ყველა მათგანი უკვე ღიად საუბრობდა, რომ შემდეგი გაჩერება - თბილისია. ტანკების კოლონები პრაქტიკულად ქალაქთან იდგნენ, საქართველოს დედაქალაქის რუკები კი ყველა სამხედროს დარიგებული ჰქონდა ასევე ჩატარებული იყო დამატებითი ინსტრუქტაჟი. თუმცა .... ბოლოს გადაწყვიტეს სააკაშვილი არ მოეშორებინათ. პოლიტიკა ცინიკური რამეა, ალბათ, რუსეთისა და აშშ-ს პრეზიდენტებმა ბანალურად მოილაპარაკეს - ხელი არ ეხლოთ სააკაშვილისათვის, სამაგიეროდ კი უკრაინაში "ჩვენი" კანდიდატი იმარჯვებდა", _ აცხადებს რუსი ოფიცერი.