უსაფრთხოების ნორმების დარღვევის გამო თელავში, ზუზუმბოს ქუჩაზე შალვა აბრამიშვილი გარდაიცვალა. როგორც გარდაცვლილის მეზობლებმა კახეთის საინფორმაციო ცენტრს აცნობეს, საცხოვრებელ სახლებთან ახლოს მაღალი ძაბვის ელექტროენერგიის გადამცემი ხაზები იმდენად დაბლა გადის, რომ ადამიანს იკრავს.
ადგილობრივების თქმით, უსაფრთხოების ნორმების დაცვის მოთხოვნით ს/ს „კახეთის ენერგოდისტრიბუციას" არაერთხელ მიმართეს. „ქუჩაში გავლის გვეშინია, რადგან ეს პირველი შემთხვევა არ არის", - აღნიშნეს ზუზუმბოს ქუჩის მაცხოვრებლებმა.
ს/ს „კახეთის ენერგოდისტრიბუციის" საზოგადოებასთან ურთიერთობის კოორდინატორის ჟანა დიდებაშვილის განცხადებით, კახეთში მაღალი ძაბვის ელექტროენერგიის გადამცემი ხაზები რამდენიმე კომპანიას ეკუთვნის. „არის ჩვენიც, სახელმწიფო ელექტროსისტემის და კერძო კომპანიების. ზუზუმბოს ქუჩაზე, სადაც ეს შემთხვევა მოხდა, მაღალი ძაბვის ელექტროენერგიის გადამცემი ხაზი რესტორან „ზუზუმბოს" ეკუთვნის. „კახეთის ენერგოდისტრიბუციის" უსაფრთხოების სამსახურმა რესტორნის ადმინისტრაცია არაერთხელ გააფრთხილა წერილობით, რომ უსაფრთხოების ნორმები დაეცვათ და ხაზები მოეწესრიგებინათ, თუმცა მათ ჩვენი მოთხოვნა არ გაითვალისწინეს", - განაცხადა ჟანა დიდებაშვილმა.
არაერთი მცდელობის მიუხედავად, კახეთის საინფორმაციო ცენტრი რესტორან „ზუზუმბოს" ადმინისტრაციას ვერ დაუკავშირდა.
მომხდართან დაკავშირებით შს თელავის სამმართველოში აღძრულია სისხლის სამართლის საქმე.
