ჩემი სუბიექტური აზრია, რომ სამცხე-ჯავახეთის ტყეებში ცეცხლი განზრახაა გაჩენილი და გამოძიებას უკვე ეჭვმიტანილები ჰყავს, _ ამის შესახებ სახელმწიფო კანცელარიაში ჟურნალისტებს გარემოს დაცვის მინისტრმა გოგა ხაჩიძემ განუცხადა, მისი თქმით, ხანძრის გაჩენასთან დაკავშირებით ეჭვმიტანილებიც არსებობენ და გამოძიება დაწყებულია.
როგორც ხაჩიძემ განაცხადა, გამოძიება მიმდინარეობს, თუმცა მანამდე აქტიურად ვცდილობთ ხანძრის სრული ლიკვიდაცია მოხდეს.
"ბოლო რამდენიმე დღეში სამცხე-ჯავახეთში ორი დიდი ხანძარი დაფიქსირდა. ერთი იყო ბორჯომის ხეობაში, რომელიც შესუსტებულია და დიდ საფრთხეს არ წარმოადგენს. მეორე კი _ აწყურში, სადაც განსხვავებული სიტუაციაა. ტყე დამწვარია 25 ჰექტარზე. ბოლო მონაცემებით ახალი კერები არ გაჩენილა. სტიქიის ადგილზე მობილიზებულია მაშველები, მეხანძრეები, 200 ჯარისკაცი და მიმდინარეობს ხანძრის სალიკვიდაციო სამუშაოები. წინასწარი პროგნოზით, ქვეყნის მასშტაბით მაღალი ტემპერატურაა მოსალოდნელი. ვითარებას ისიც ამძიმებს, რომ საღამოობით ქარი ძლიერდება ცეცხლის გავრცელებას ხელს უწყობს", _ განაცხადა ხაჩიძემ.
