საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრმა კობა სუბელიანმა და შიდა ქართლის გუბერნატორმა ზურაბ არსოშვილმა დღეს ქარელის რაიონის სოფელ მოხისის დევნილთა დასახლებაში სადრენაჟო სისტემის მშენებლობის სამუშაოები მოინახულეს . სისტემა, რომლის მშენებლობაც ივნისის თვეში დაიწყო აგვისტოს ბოლოს დასრულდება და დასახლების მაცხოვრებლებს დატბორვის პრობლემას მოუხსნის. სისტემის მშენებლობა ლტოლვილთა და განსახლების სამინისტროს, შიდა ქართლის გუბერნატორის, გაეროს ბავშვთა ფონდის და საერთაშორისო მაშველთა კომიტეტის მიერ გაფორმებული მემორანდუმის ფარგლებში ხორციელდება და შვედეთის საერთაშორისო განვითარების სააგენტო აფინანსებს. მემორანდუმის ფარგლებში ანალოგიური სისტემა გორის რაიონის სოფელ სკრის დევნილთა დასახლებაშიც შენდება.
მინისტრი და გუბერნატორი მოხისის დასახლებაში მცხოვრებ დევნილებსაც შეხვდნენ და დასახლებაში არსებულ პრობლემებზე და მათი გადაჭრის გზებზე ისაუბრეს.
"ამ დასახლების მაცხოვრებელთა მთავარი პრობლემა ნალექიანი ამინდების დროს დატბორვა იყო. სადრენაჟო სისტემის მშნებლობით, რომელზეც ადგილობრივი მოსახლეობაა დასაქმებული, აღნიშნული პრობლემა მოხისში აღარ იქნება, რის შემდეგაც დღის წესრიგში დადგება დასახლების სხვა პრობლემების მოგავრება," _ აღნიშნა ზურაბ არსოშვილმა.
