აშშ-ს არ შეუცვლია დამოკიდებულება აფხაზეთისა და სამხრეთ ოსეთის დამოუკიდებლობასთან მიმართებაში და იგი კვლავ მხარს უჭერს საქართველოს ტერიტორიულ მთლიანობას. ეს განცხადება აშშ-ს სახელმწიფო დეპარტამენტის წარმომადგენელმა ფილიპ ქროულიმ გააკეთა.
"აშშ-ს სახელმწიფო მდივანი რამდენიმე ხნის წინ საქართველოში იმყოფებოდა, სადაც კიდევ ერთხელ განაცხადა ჩვენი მხარდაჭერის შესახებ საქართველოს ტერიტორიული მთლიანობისადმი. მან ასევე მოუწოდა რუსეთს დაიცვას პრეზიდენტების სარკოზის, მედვედევისა და სააკაშვილის მიერ 2008 წელს ხელმოწერილი შეთანხმება ცეცხლის შეწყვეტის თაობაზე", _ განაცხადა ქროულიმ საქართველოში რუსული ინტერვენციის ორი წლისთავის კომენტირებისას.
"გვინდა, რომ რუსეთი თანმიმდევრულად მიჰყვეს თავის მიერ ნაკისრ ვალდებულებებს და ჩვენ გავაგრძელებთ რუსეთისათვის მოწოდებებს თანამშრომლობის საკითხში", _ განაცხადა ქროულიმ.
