აშშ-ს სენატორის ჯონ მაკკეინის განაცხადებით, თუ დიმიტრი მედვედევს აინტერესებს პოლიტიკური და ეკონომიკური მოდერნიზაციის მოდელი მას შეუძლია საქართველოს შეხედოს.
ამის შესახებ ნათქვამია მაკკეინის განცხადებაში, რომელიც რუსეთ-საქართველოს აგვისტოს ომის ორი წლისთავთან დაკავშირებით "ვაშინგტონ პოსტში" გამოქვეყნდა.
"მიუხედავად რუსეთის მხრიდან მუდმივი საფრთხისა საქართველო აგრძელებს წინსვლას. თითქმის ათასამდე ქართველი ჯარისკაცი იმყოფება ჩვენს გვერდით ავღანეთში და იმაზე კარგად ასრულებენ თავის მოვალეობას, ვიდრე ზოგიერთი ნატოს წევრი ქვეყანა. ასევე, საქართველო აძლიერებს კანონის უზენაესობას, ებრძვის კორუფციას და ავითარებს ეკონომიკას. წელს საქართველოს დედაქალაქში გამართული მერის არჩევნები კი საერთაშორისო საზოგადოებამ აღიარა, როგორც თავისუფალი და გამჭირვალე. ამის გათვალისწინებით, კი თუ დიმიტრი მედვედევს აინტერესებს პოლიტიკური და ეკონომიკური მოდერნიზაციის მოდელი მას შეუძლია საქართველოს შეხედოს. ხოლო თუ ობამას ადმინისტრაციას სურს ურთიერთობა, რომელსაც მართლაც სჭირდება გადატვირთვა მან სწორედ საქართველოსკენ უნდა გაიხედოს", - განაცხადა მაკკეინმა.
მისვე თქმით, მედვედევმა უნდა იცოდეს, რომ თანამშრომლობა აშშ-სთვის საქართველოსთან ურთიერთობა პრიორიტეტია და თუ მოსკოვი არ მიიღებს ამ პრიორიტეტს, ის არ უნდა ელოდოს ვაშინგტონიდან მსოფლიო სავაჭრო ორგანიზაციაში გაწევრიანებასთან დაკავშირებით მხარდაჭერას.
"ყველა იმ ზიანის მიუხედავად, რომელიც საქართველოს რუსეთმა მიაყენა კრემლმა სტრატეგიულ მიზანს მაინც ვერ მიაღწია. საქართველოს დემოკრატიული მთავრობა გადარჩა და ვითარდება კიდეც. ჩვენ გვაქვს შესაძლებლობა მხარი დავუჭიროთ ძლიერ, ერთიან და თავისუფალ ერს. უნდა გვახსოვდეს ვინ არიან ჩვენი რეალური მეგობარი", - აცხადებს სენატორი.
