რუსული ოპოზიციური ძალები და საზოგადოებრივი ორგანიზაციები კრემლისგან საქართველოს ოკუპირებული ტერიტორიებიდან ჯარის გაყვანას მოითხოვენ. აღნიშნული მოთხოვნით მათ სამშვიდობო აქცია აგვისტოს ომის ორის წლისთავთან დაკავშირებით დღეს გორში გამართეს.
ანდრე ნეკრასოვის და ოლეგ პამფილოვის შეფასებით, აგვისტოს ომით პუტინის რუსეთმა თავის რეალური სახე აჩვენა და დამტკიცა, რომ ამ ქვეყანაში დემოკრატია არ არსებობს.
"ორი წლის წინ ჩემმა ქვეყანამ პატარა საქართველოს ოკუპაცია მოახდინა. სამწუხაროა, რომ ამას რუსული მედია მხოლოდ დღეს ხვდება. შედეგად მივიღეთ ევროპის რუკის ცვლილება. ასევე, სამწუხაროა, რომ მსოფლიო ამ ფაქტზე მკაფიო რეაგირებას არ ახდენს", - აღნიშნა ნეკრასოვმა.
შეგახსენებთ, რომ 2008 წლის 8 აგვისტოს რუსეთის საოკუპაციო ჯარი საქართველოს ტერიტორიაზე, ცხინვალის რეგიონში როკის გვირაბიდან შემოიჭრა.
ხუთდღიანი ბრძოლის შემდეგ საქართველოსა და რუსეთს შორის ევროკავშირის თავმჯდომარე ქვეყნის, საფრანგეთის პრეზიდენტის ნიკოლა სარკოზის შუამდგომლობით 12 აგვისტოს ცეცხლის შეწყვეტის შესახებ ხელშეკრულებას ხელი მოეწერა, რომელში ერთ-ერთი მთავარი პუნქტი რუსული საოკუპაციო ჯარების საქართველოს ტერიტორიიდან გაყვანას ითვალისწინებდა. მიუხედავად ამისა, მოსკოვმა ხელშეკრულება რამდენიმე დღეშივე დარღვია და ახალგორის რაიონის ოკუპაცია მოახდინა. ამასთან, რუსმა ავიაციის მიერ საქართველოს ტერიტორიების დაბომბვას, მათ შორის თბილისის არაერთი მშვიდობიანი მოსახლე შეეწირა. ამავე წლის 26 სექტემბერს კი რუსეთმა აფხაზეთის და ე.წ. სამხრეთ ოსეთის ე.წ. დამოუკიდებლობა აღიარა.
