პრობლემები ჩნდებიან და ქრებიან, მტრები მოდიან და მიდიან და საქართველოა არის და იქნება უკვდავი, იმიტომ რომ ჩვენ ვართ მართლები და იმიტომ რომ ჩვენ ვართ ჩვენს ქვეყანაში და ვიცავთ ჩვენს თავისუფლებასა და ჩვენი და ჩვენი შვილების ღირსებას, _ განაცხადა საქართველოს პარლამენტის თავმჯდომარემ, დავით ბაქრაძემ 7 აგვისტოს განმუხურში, სადაც მან "თავისუფლების ბულვარი" გახსნა.
მისი თქმით, მთელი საქართველოს ისტორია მტერთან ბრძოლაა და ფერფლიდან აღდგომა.
"მთელი საქართველოს ისტორიის განმავლობაში მოდიოდნენ მტრები, რომლებიც ცეცხლით, სისხლით, მახვილითა და ტყვიით ცდილობდნენ საქართველოს განადგურებას. სჯეროდათ, რომ ამით ქვეყანას დააჩოქებდნენ. მაგრამ საქართველოს მთელი ისტორია არის ფერფლიდან აღდგომა. არის ფეხზე დადგომა, გაძლიერება და არის კიდევ უფრო გალამაზება. ეს არის საქართველოს სიმბოლო და ამიტომ არის ჩვენი ქვეყანა უკვდავი", _ განაცხადა ბაქრაძემ.
