სიღნაღის მუნიციპალიტეტის სოფელ ანაგის საჯარო სკოლიდან 16 მასწავლებელი გაათავისუფლეს. როგორც უსამსახუროდ დარჩენილმა მასწავლებლებმა კახეთის საინფორმაციო ცენტრს აცნობეს, სკოლის დირექტორმა პედაგოგები სამსახურში ნათესაური ნიშნით დატოვა.
„სკოლაში დირექტორის ბევრი ნათესავი და ახლობელი მუშაობს. ყველა მათგანი სამსახურში დატოვა. ჩვენი არც სამუშაო სტაჟი გაითვალისწინა, არც მიღწევები და სამსახურიდან დაგვითხოვა. სადაც გინდა მიჩივლეთ, ვერაფერს ვერ გახდებითო, გვითხრა დირექტორმა. არ ვაპირებთ მისი ქმედებები რეაგირების გარეშე დავტოვოთ. დირექტორი თავის თანამდებობას ბოროტად იყენებს და ამაზე პასუხს ვაგებინებთ", - აღნიშნეს სკოლიდან გათავისუფლებულმა მასწავლებლებმა.
ანაგის საჯარო სკოლის დირექტორის თამარ ჯოხარიძის განცხადებით, პედაგოგებთან დადებული შრომითი ხელშეკრულებების ვადა ამოიწურა და ახალი ხელშეკრულება მხოლოდ იმდენ პედაგოგთან გააფორმა, რამდენიც სკოლას სჭირდება.
