"კონსერვატიული პარტიის" ლიდერი ზვიად ძიძიგური 2007 წლის 7 ნოემბერს მიხეილ სააკაშვილის მიერ თავისი მოსახლეობის დასჯის მცდელობად აფასებს.
"ეს იყოს მიხეილ სააკაშვილის მხრიდან თავისი მოსახლეობის სამაგალითოდ დასჯის მცდელობა. დასჯისა ისე, რომ მას პროტესტის დაფიქსირების სურვილი აღარასდროს გასჩენოდა. მაგრამ ხელისუფლებას ეს არ გამოუვიდა და სააკაშვილმა კარგად დაინახა, რომ ქართულ საზოგადოებასთან სხვაგვარად საუბარი და ლაპარაკია საჭირო", - განუცხადა ძიძიგურმა "ჯი-ეიჩ-ენს".
მისი განმარტებით, ხელისუფლებას შეეძლო პოლიტიკური სიტუაციის ისე დარეგულირება, რომ მოსახლეობა არ დაერბია, თუმცა ამისთვის მას არც პოლიტიკური ნება გამოუჩენია და არც სურვილი.
"ხელისუფლებას მხოლოდ ერთი ტერორის, დაშინების და ძალადობის გზით შეუძლია ქვეყნის მართვა და ამით ცდილობს მოქალაქეები დაიმორჩილოს. სააკაშვილს მიაჩნია, რომ ის ხალხის მსახური კია არა, მისი უფროსია, რის გამოც მისი მმართველობის სტილი დემოკრატიული ქვეყნებისთვის დამახასიათებელი მმართველობისგან აბსოლუტურად განსხვავებულია", - განმარტა ძიძიგურმა.
მისი განმარტებით, 7 ნოემბრის ორი წლისთავს პოლიტიკური პარტიები და სამოქალაქო საზოგადოება ერთდღიანი საპროტესტო აქციით აღნიშნავენ.
შეგახსენებთ, რომ ხვალ, 7 ნოემბერს, 2007 წლის 7 ნოემბრის ცნობილი მოვლენებიდან ორი წელი სრულდება. 2007 წლის 7 ნოემბერს, 5-დღიანი საპროტესტო მიტინგების შემდეგ, ხელისუფლებამ პარლამენტის შენობის წინ მიმდინარე მანიფესტაცია ძალის გამოყენებით დაშალა. იმ დღეს მოსახლეობა წყლის ჭავლისა და ცრემლსადენი გაზის გამოყენებით 4-ჯერ დაარბიეს.