ოს სეპარატისტთა ლიდერი ედუარდ კოკოითი თავისი მეორე "საპრეზიდენტო" ვადის ამოწურვის შემდეგ პოლიტიკური საქმიანობისთვის თავის დანებებას არ აპირებს. ამის შესახებ განცხადება კოკოითიმ დღეს გააკეთა.
აღსანიშნავია, რომ ოს სეპარატისტთა ლიდერს "მეორე საპრეზიდენტო ვადა" 2011 წლის ბოლოს ეწურება. მორიგი "საპრეზიდენტო არჩევნები" კი ე. წ. სამხრეთ ოსეთში 2011 წლის ნოემბერშია დაგეგმილი.
"რა თქმა უნდა, პოლიტიკური მოღვაწეობის გაგრძელებას ვაპირებ. ფიცი დავდე, ვემსახურო ჩემს ხალხს და ეს უნდა გავაკეთო იმისდა მიუხედავად, თუ რა თანამდებობაზე ვიქნები", _ განაცხადა კოკოითიმ და აღნიშნა, რომ "სამხრეთ ოსეთის რესპუბლიკის კონსტიტუციის" შეცვლას არ აპირებს იმისათვის, რათა მესამე ვადით იყაროს კენჭი.
"ჯერ კიდევ პირველად რომ ვიყრიდი კენჭს, 2001 წელს, მაშინ ვთქვი, რომ არ ვაპირებ კონსტიტუციის შეცვლას", _ განაცხადა მან.
სეპარატისტთა ლიდერმა არ დააკონკრეტა, რომელ პოლიტიკურ ასპარეზზე აპირებს ნაყოფიერი მოღვაწეობის გაგრძელებას.
"ვადის დასრულებამდე კიდევ ერთი წელია, ჯერ კიდევ მნიშვნელოვანი ამოცანების წინაშე ვდგავართ. ყველაფერს გავაკეთებ იმისათვის, რომ სამხრეთ ოსეთის მომავალ პრეზიდენტს მუშაობა გავუადვილო და იმ პრობლემების მინიმუმი დავახვედრო, რაც ახლა არსებობს", _ განაცხადა კოკოითიმ.
