რუსეთის პრეზიდენტმა დიმიტრი მედვედევმა გააკეთა განცხადება იმის შესახებ, რომ იგი საქართველოს პრეზიდენტ მიხეილ სააკაშვილის თანამდებობიდან წასვლის შემდეგ საქართველოსთან სრულფასოვანი ურთიერთობის აღდგენისთვის მზადაა.
სამხრეთ აფრიკის პრეზიდენტთან შეხვედრის შემდეგ გამართულ პრესკონფერენციაზე მედვედევმა კიდევ ერთხელ აღნიშნა, რომ რუსეთსა და საქართველოს შორის ურთიერთობები რუსეთის ბრალეულობით არაა გაწყვეტილი.
"ყველაფერზე, რაც მოხდა, სრული პასუხისმგებლობა საქართველოს ხელისუფლებას და პირადად პრეზიდენტ სააკაშვილს ეკისრება. საქართველოს ახლანდელი ხელისუფალის პირობებში შეუძლებელია ამ ქვეყანასთან ნორმალური ურთიერთობები გვქონდეს, მაგრამ ეს სულაც არ ნიშნავს იმას, რომ ასეთი ურთიერთობების აღდგენა სრული მოცულობით შეუძლებელი იქნება იმ პერიოდში, როდესაც საქართველოს ხელისუფლების სათავეში სხვა ადამიანები მოვლენ", _ აცხადებს მედვედევი.
რუსეთის პრეზიდენტი დარწმუნებულია, რომ "ქართველი ხალხი ადრე თუ გვიან გააკეთებს არჩევანს. ის მრავალსაუკუნოვანი და მეგობრული ურთიერთობები, რომლებიც ქართველ და რუს ხალხს საუკუნეების განმავლობაში აკავშირებდა, სრული მოცულობით აღდგება და ჩვენ შევძლებთ თანამშრომლობას ყველა სფეროში".
"აბსოლუტურად დარწმუნებული ვარ, რომ ეს არ იქნება დამოკიდებული იმ პოლიტიკოსების ნება-სურვილზე, რომლებიც ცდილობდნენ ჩვენი ურთიერთობის სცენარი სხვა სიბრტყეში წარემართათ. კარგად გვესმის, ვინ ჩაიდინა ეს დანაშაული და ვინ უნდა აგოს ამაზე პასუხი", _ აცხადებს მედვედევი და ხაზგასმით აღნიშნავს: "დარწმუნებული ვარ, რუსულ-ქართულ ურთიერთობებს წინ საუკეთესო დრო აქვს".
