„ამ მდგომარეობაში იმის გამო აღმოჩნდა, რომ „ქართული ოცნების“ დეპუტატი იყო, ის ადგილობრივი თვითმმართველობის არჩევნებისას ხელმეორედ აპირებდა დეპუტატად კენჭისყრას, ის ამისთვის ემზადებოდა, შეხვედრებზე დადიოდა. მასთან სუს-ის წარმომადგენელი მივიდა და უთხრა, თუ კენჭისყრაზე ზრუნვას არ შეეშვები, პრობლემას შეგიქმნიანო. რა თქმა უნდა, მან ეს გაფრთხილება არ შეასრულა, რის შედეგადაც მოხდა ის, რაც მოხდა“, - განუცხადა „ჯი-ეიჩ-ენს“ საკრებულოს ყფოლი დეპუტატის, ქრთამის აღების ბრალდებით დაკავებულ, ზურაბ ნეფარიძის ადვოკატმა, ედიშერ ქარჩავამ.
როგორც ადვოკატი განმარტავს, მისი დაცვის ქვეშ მყოფზე 7 თვის განმავლოვბაში ფსიქოლოგიურად ზემოქმედებდნენ და პირადი ცხოვრების ამსახველი კადრებით აშანტაჟებდნენ.
„7 თვის განმავლობაში მასზე ფსიქოლოგიური ზეწოლა მიმდინარეობდა. მას მოდულის შენობაში რამდენიმე პირთან ერთად, პროკურორი დახვდა და უთხრა, რომ 2016 წლის ივლის-აგვისტოს პერიოდში, მის სამუშაო ოფისში ფარული აუდიო-ვიდეო ჩაწერა მიმდინარეობდა, რომელშიც თანამშრომელთან მისი სექსუალური ურთიერთობა იყო ასახული.
აღნიშნული ნეფარიძემ დღესაც დაადასტურა და თქვა რომ ამ კადრებით მასზე გარკვეული ზეწოლა მიმდინარეობდა, რათა ბრალი ეღიარებინა“, - აცხადებს ქარჩავა.
მისი განმარტებით, ნეფარიძე მზად იყო არარსებული ფაქტი ეღიარებინა, თუ პროკურატურა მის შვილსა და რძალს თავს დაანებებდა.
„მას სურვილი ჰქონდა, შვილი და რძალი გარკვეული პასუხისმგებლობიდან აეცდინა. რა თქმა უნდა, მამის გამო შვილი, ან რძალი პასუხს არ უნდა აგებდნენ. ბოლოს მას უთხრეს, თუ ბრალს აღიარებ, მოსამართლე ალბათ, 11 წელს მოგცემს, ამას გარდა, შენი შვილი და რძალიც პასუხისგებაში უნდა მივცეთ, ასევე 10 000 ლარი ჯარიმა უნდა გადაიხადოო, რაც მისთვის უკვე ბოლო წვეთი იყო. როგორც გავიგე, გუშინ გვიან ღამე მას სუიციდის მცდელობაც ჰქონდა, რაც კამერებმა დააფიქსირეს და თანამშრომლებმა დროულად შეუსწრეს.
მას არცერთ ეტაპზე აღიარებითი ჩვენება არ აქვს მიცემული, სწორედ ამას ითხოვს მისგან პროკურატურა. თავის დროზე, შვილს მამის კადრები დაუდეს და ამ ფსიქოლოგიური ტერორის ქვეშ, მამის რეპუტაცია რომ არ შელახულიყო, შვილს დააწერინეს, რომ მამა ქრთამს იღებდა“, - აცხადებს ქარჩავა.
დღევანდელ პროცესზე, რომელიც სასჯელაღსრულების #8 დაწესებულებაში გაიმართა, ბრალდებულმა ნეფარიძემ პროკურორ ბექა ეჟიშვილის აცილების საკითხიც დააყენა, თუმცა, აღნიშნული შუამდგომლობა მოსამართლემ არ დააკმაყოფილა.