გუშინ, გარემოს დაცვისა და სოფლის მეურნეობის მინისტრის მოადგილე ნინო თანდილაშვილი მთელი დღის განმავლობაში ახორციელებდა ჩემზე ზეწოლას, როგორც სატელეფონო საუბრებში, ასევე Viber-ში მიმოწერით, რომ გარემოს ეროვნული სააგენტოს ხელმძღვანელის პირველი მოადგილის თანამდებობაზე დამენიშნა კონკრეტული პირი, - ამის შესახებ გარემოს ეროვნული სააგენტოს ყოფილმა ხელმძღვანელმა თამარ ბაგრატიამ პრესკონფერენციაზე განაცხადა.
მისი თქმით, ის პიროვნების კვალიფიკაცია, ვის დანიშვნასაც კატეგორიულად თხოვდნენ, არ შეესაბამებოდა იმ გამოწვევებს, რომელიც გარემოს ეროვნულ სააგენტოს გააჩნია.
"გუშინ დავტოვე გარემოს ეროვნული სააგენტოს უფროსის თანამდებობა ჩემი სურვილის საფუძველზე. ამ განცხადებას და ასეთი სურვილის გაჩენას წინ უძღოდა საკმაოდ მნიშვნელოვანი პროცესები. კერძოდ, გუშინ, გარემოს დაცვისა და სოფლის მეურნეობის მინისტრის მოადგილე, ნინო თანდილაშვილი მთელი დღის განმავლობაში ახორციელებდა ჩემზე ზეწოლას როგორც სატელეფონო საუბრებში, ასევე Viber-ში მიმოწერით, რომ გარემოს ეროვნული სააგენტოს ხელმძღვანელის პირველი მოადგილის თანამდებობაზე დამენიშნა კონკრეტული პირი. მე არ ვთვლიდი, რომ ის ადამიანი, რომელზეც მიმითითებდნენ ასე ცალსახად და დაჟინებულად იყო, ის კადრი, რომელიც გაართმევდა თავს გარემოს ეროვნული სააგენტოს უფროსის მოადგილის ფუნქცია-მოვალეობებს და იქნებოდა ეფექტური თანამშრომელი. მისი კვალიფიკაცია არ შეესაბამებოდა იმ გამოწვევებს, რომელიც გარემოს ეროვნულ სააგენტოს გააჩნია", - განაცხადა ბაგრატიამ.
მისივე თქმით, ასეთი ტიპის პირობებში, როდესაც მინისტრის მოადგილე ულტიმატუმებით საუბრობდა და მასზე ფსიქოლოგიურ ზეწოლას ახდენდა, გადაწყვიტა თავი აერიდებინა საკითხის შემდგომ ესკალაციას და მისი ნებით დაეტოვებინა თანამდებობა.
"ულტიმატუმივით იყო, რომ მე 17:00 საათზე აუცილებლად უნდა მომეწერა ხელი ამ ადამიანის დანიშვნაზე. ეს ადამიანი დამიკავშირდა კიდეც, უკვე მოდიოდა სააგენტოში, რომ განცხადება დაეწერა. მე მას ვუთხარი, რომ დროებით გაჩერებულიყო, არ მოსულიყო, რადგან არ ვაპირებდი ასეთი გადაწყვეტილების მიღებას. მას შემდეგ, რაც დღე იწურებოდა და მეც კარგად გავაანალიზე სიტუაცია, ჩავთვალე, რომ უმჯობესი იყო მე დამეტოვებინა სააგენტოს უფროსის თანამდებობა. ჩემი აზრით, ასეთი ტიპის პირობებში, როდესაც მინისტრის მოადგილე ასეთი ტიპის ულტიმატუმებით საუბრობდა და ახდენდა ჩემზე ფსიქოლოგიურ ზეწოლას, ავარიდე საკითხის შემდგომ ესკალაციას თავი და გადავწყვიტე, რომ მე თვითონ დამეტოვებინა თანამდებობა. ეს ნაბიჯი არის ჩემი მხრიდან პროტესტი ასეთი ტიპის ფაქტზე. მე არ ვაპირებ სინდისთან კომპრომისებზე წასვლას და ჩემი გადაწყვეტილებები ვერ იქნება ისეთი, რომელიც ეწინააღმდეგება ჩემს პრინციპებს”, - აღნიშნა ბაგრატიამ.
მან აქვე განაცხადა, რომ თუ საჭირო გახდება, ის ნინო თანდილაშვილთან მიმოწერას გაასაჯაროვებს.
"მიმოწერის გასაჯაროებას არ ვაპირებ ამ ეტაპზე. როგორც ვიცი ქალბატონი ნინო უარყოფს ამ მიმოწერას. თუ საჭირო გახდება, ნამდვილად მზად ვარ გავასაჯარო მიმოწერა, ხოლო თუ ხელმისაწვდომი იქნება სატელეფონო ზარები, დამერწმუნეთ, ეს ნამდვილად უფრო რთული მოსასმენი იქნება", - დასძინა ბაგრატიამ.
ცნობისთვის, ცნობისთვის, თამარ ბაგრატიამ გარემოს ეროვნული სააგენტოს უფროსის თანამდებობა გუშინ დატოვა, თანამდებობის დატოვების მიზეზი კი დღეს Facebook-ის პირად გვერდზე განმარტა.