საქართველოსა და ისრაელს შორის არსებულ ურთიერთობებს ვერავინ და ვერაფერი შეაფერხებს, – ასე გამოეხმაურა თბილისის მერი კახა კალაძე „სითი პარკის“ წარმომადგენლების განცხადებას, რომ მერიის მიერ მიღებული გადაწყვეტილება ორ ქვეყანას შორის არსებულ ურთიერთბებზე ნეგატიურად აისახება.
კალაძემ თქმით, „ეს არის უბრალოდ არაკეთილსინდისიერი კომპანიის მხრიდან მანიპულირება".
„ჩვენ ყველას მივესალმებით, ვინც კეთილსინდისიერი ინვესტორი კომპანიაა. არ აქვს მნიშვნელობა ეს იქნება ქართული ბიზნესი თუ უცხოური, ჩვენი კარი ყველასთვის არის ღია. არაკეთილსინდისიერ კომპანიებს, რა თქმა უნდა, მოვექცევით კანონის ფარგლებში“, – განაცხადა კალაძემ, რომელმაც აქვე აღნიშნა, რომ საჭიროების შემთხვევაში, მერია მზად არის, საკუთარი პოზიცია სასამართლოში დაიცვას.
„თუ კომპანიას ექნება სურვილი სასამართლოში წავიდეს, ჩვენ მზად ვართ, სასამართლოში დავიცვათ ჩვენი პოზიციები. თუ ექნებათ სურვილი საარბიტრაჟო სასამართლოში წასვლის, ჩვენ მზად ვართ დავიცვათ ჩვენი პოზიციები", - დასძინა კალაძემ.
ცნობისთვის, „სითი პარკის“ წარმომადგენელმა 13 მარტს განაცხადა, რომ მერიის მიერ უსაფუძვლოდ მიღებული გადაწყვეტილებები დააზიანებს ქვეყნის იმიჯს საერთაშორისო დონეზე და გავლენას იქონიებს საქართველოსა და ისრაელს შორის ურთიერთობებზე.
ასევე, „სითი პარკის“ მფლობელებმა გუშინ განცხადება გაავრცელეს, სადაც აღნიშნავენ, რომ მერიის გადაწყვეტილება მაგალითია იმისა, თუ როგორ ეპყრობა ხელისუფლება უცხოელ ინვესტორებს.
შეგახსენებთ, თბილისის მერია მიმდინარე წლის 10 აპრილიდან კომპანია „სითი პარკთან“ გაფორმებულ ხელშეკრულებას წყვეტს.
