ის, რაც ჩვენთვის არის ტრაგიკული, სხვა ქვეყნებისთვის, მეზობელი იქნება თუ არამეზობელი, შესაძლებელია იყოს მხოლოდ სამწუხარო, - ასე გამოეხმაურა „პატრიოტთა ალიანსის“ წევრი ნატო ჩხეიძე რუსეთის საგარეო საქმეთა სამინისტროს განცხადებას.
ჩხეიძის განცხადებით, არაფერია განსაკუთრებული იმაში, რომ სხვა ქვეყანა მეზობელი ქვეყნის ტრაგედიას სამწუხაროდ მიიჩნევს და არა ტრაგიკულად.
„ვერ გეტყვით ინციდენტი არის თუ არა, რაც მე იქ ამოვიკითხე, ეს არის სამწუხარო ფაქტი. იცით სხვადასხვა ქვეყნები სხვადასხვანაირად აღიქვამენ მოვლენებს, ის რაც ჩვენთვის არის ტრაგიკული სხვა ქვეყნებისთვის, მეზობელი იქნება თუ არამეზობელი, შესაძლებელია იყოს მხოლოდ სამწუხარო", - განაცხადა ნატო ჩხეიძემ.
ჟურნალისტის შეკითხვაზე, რუსეთი არის თუ არა შუაში არჩილ ტატუნაშვილის მკვლელობის საქმესთან, ჩხეიძე პასუხობს, რომ „არის თუ არა შუაში, ამას წერილებში ვერ ამოვიკითხავთ. აქ ამოვიკითხე, რომ ის რაც მოხდა არის ძალიან სამწუხარო და სასურველია აღარ მოხდეს“.