მინდა ხაზგასმით განვმარტო, რუსული პოლიტიკურ თარგმანში პირველად არ ხდება, რომ რეალური სასურველით იცვლება, არსად არ ყოფილა და ვერ იქნებოდა საუბარი პირდაპირ დიალოგზე აფხაზეთთან და "სამხრეთ ოსეთთან", - ამის შესახებ შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა, რუსეთის საგარეო საქმეთა სამინისტროს განცხადებასთან დაკავშირებით აღნიშნა.
მისი თქმით, საუბარია აფხაზებთან და ოსებთან, საზოგადოებასთან, ადამიანებთან დიალოგზე.
"თქვენ მოისმინეთ საგარეო საქმეთა სამინისტროს განცხადება. მეც იმედს გამოვთქვამ, რომ ისინი ჩაერთვებიან დისკუსიაში კონსტრუქციულად, რაც იმაში გამოიხატებოდა, რომ საკითხები, რომელიც დღის წესრიგში დგას 2008 წლიდან და უკავშირდება ცეცხლის შეწყვეტის შეთანხმებით აღებულ ვალდებულების შესრულებას რუსეთის მხრიდან, ამ საკითხებზე იქნება რეალური პროგრესი, ისევე როგორც სხვა ბევრ მნიშვნელოვან საკითხზე. ქართული მხარე ყოველთვის კონსტრუქციულია და ასეც გააგრძელებს მუშაობას. რაც შეეხება პირდაპირ დიალოგს, მინდა ხაზგასმით განვმარტო, რუსული პოლიტიკურ თარგმანში პირველად არ ხდება, რომ რეალური სასურველით იცვლება, არსად არ ყოფილა და ვერ იქნებოდა საუბარი პირდაპირ დიალოგზე აფხაზეთთან და "სამხრეთ ოსეთთან". დარწმუნებული ვარ, ეს კარგად ესმით რუსულ პოლიტიკურ ისტაბლიშმენტში. საუბარი გახლავთ აფხაზებთან და ოსებთან, საზოგადოებასთან, ადამიანებთან დიალოგზე, რომლებთან ერთადაც ჩვენ მომავალში წარმოგვიდგენია ცხოვრება. ვგულისხმობთ საზოგადოებას ამ შემთხვევაში და ყველა იმ არაპოლიტიზირებულ ფორმატს, რომელსაც მოითხოვს კონფლიქტის მოგვარების, შერიგების და ჩართულობის ამოცანების გადაჭრას. ამ მიმართულებით ჩვენ გარკვეული გამოცდილება გვაქვს. ეს არხები დღესაც ფუნქციონირებს. ქმედითი ნაბიჯები იქნებოდა, რომ ამას ხელი არ შეეშალოს, სამწუხაროდ, ამის პრეცენდენტები გვაქვს, როდესაც ხდება ასეთი ორმხრივი საზოგადოებრივი ურთიერთობებისთვის მიზანმიმართული ხელის შეშლა. ჩვენი ამოცანაა, რომ ერთის მხრივ, რუსეთთან მიმართებაში ჟენევის ფორმატში იყოს გარკვეული პროგრესი მიღწეული და მეორეს მხრივ, ჩვენ გვქონდეს შესაძლებლობა განვავითაროთ აფხაზურ და ოსურ საზოგადოებებთან დიალოგი", - განაცხადა ქეთევან ციხელაშვილმა.
ციხელაშვილმა პრემიერ-მინისტრ გიორგი კვირიკაშვილის განცხადებაზეც ისაუბრა და აღნიშნა, რომ პრემიერის განცხადებაში ძალიან ნათლად იყო გამოხატული ყველა ის მნიშვნელოვანი ასპექტი, რომელიც რუსულ-ქართული ურთიერთობის მოწესრიგების წინაპირობაა.
"ვფიქრობ, პრემიერის განცხადებაში ძალიან ნათლად იყო გამოხატული ყველა ის მნიშვნელოვანი ასპექტი, რომელიც გახლავთ რუსულ-ქართული ურთიერთობის მოწესრიგების წინაპირობა. ვგულისხმობ კონფლიქტის მოგვარებას და იმ მთავარი გამოწვევის დაძლევას, რაც ჩვენ 2008 წლიდან გვაქვს. ამის ნაწილია ტატუნაშვილის ტრაგედია და ქმედითი ნაბიჯი იქნებოდა ცხედრის გადმოცემა ოჯახისთვის, რომელიც ამდენი ხანი ჭიანურდება. ეს უნდა მომხდარიყო არა იმის გამო, რომ ეს ვინმეს კეთილი ნებაა, არამედ იმის გამო, რომ ეს უკავშირდება პასუხისმგებლობას დღეს ამ რეგიონში მიმდინარე მოვლენებზე", - დასძინა ციხელაშვილმა.
