კარგია, რომ მიჯერებს კახა კალაძე, - ასე გამოეხმაურა თბილისის მერობის ყოფილი კანდიდატი ალეკო ელისაშვილი „სითი პარკთან“ ხელშეკრულების გაწყვეტის საკითხს.
ელისაშვილის თქმით, მისი აზრით, ეს სინამდვილეში ემსახურება იმას, რომ როგორღაც გამოძვრეს კახა კალაძე ლევან გაჩეჩილაძისთვის 30 000 ლარის გადახდის საკითხიდან.
ალეკო ელისაშვილი „სითი პარკთან“ ხელშეკრულების გაწყვეტას მიესალმება, თუმცა, მისი შეფასებით, ეს ძალიან დაგვიანებულია.
ელისაშვილის განცხადებით, „სითი პარკი“ გასაშვები იყო, მაგრამ ახლა ძალიან მნიშვნელოვანია ის, რომ მარტო კონტრაქტის გაწყვეტა ვერ მოაგვარებს ავტომატურად პარკინგის პრობლემას, შესაბამისად, სხვა ძალიან მნიშვნელოვანი ნაბიჯებია გადასადგმელი.
„კარგია, რომ მიჯერებს კახა კალაძე. ალბათ, კარგად გახსოვთ, როცა ვამბობდი იმას, რომ ჯარიმის გადახდას ვერ ავცდებით, თუმცა წინასაარჩევნოდ თავად კახა კალაძეც ამბობდა, რომ ვერ აყვებოდა ზოგიერთი პოპულისტის განცხადებას „სითი პარკთან“ ხელშეკრულების გაწყვეტის და ჯარიმის გადახდასთან დაკავშირებით. ხომ ხედავს, რომ უნდა დამიჯეროს. რაშიც არ მიჯერებს ყველაფერზე კი იმტვრევს ცხვირს. „სითი პარკი“ გასაშვები იყო, მაგრამ ახლა ძალიან მნიშვნელოვანია ის, რომ მარტო კონტრაქტის გაწყვეტა ვერ მოაგვარებს ავტომატურად პარკინგის პრობლემას, შესაბამისად, სხვა ძალიან მნიშვნელოვანი ნაბიჯებია გადასადგმელი. დაველოდოთ ამ ნაბიჯებს. მივესალმები ხელშეკრულების გაწყვეტას, თუმცა ეს ძალიან დაგვიანებულია. თბილისის მერიას მოუწევს 25 მილიონიანი ჯარიმის გადახდა. ისიც გაითვალისწინეთ, რომ ზუსტად ისე ხდება, როგორც მე ვამბობდი, რომ 10 აპრილიდან მერიას მოუწევს მუნიციპალურ სერვისად ამის აღება, ანუ პარკინგის მოწესრიგება“, – განაცხადა ალეკო ელისაშვილმა.
ცნობისთვის, თბილისის მერია „სითი პარკთან“ ხელშეკრულებას წყვეტს.
