მოზარდებს შორის მომხდარი კიდევ ერთი სისხლიანი გარჩევის სასამართლო პროცესი ხვალ, 13 მარტს, თბილისის საქალაქო სასამართლოში 13:00 საათზეა ჩანიშნული.
17 წლის არასრულწოვანი, რომლესაც სახელმწიფო ბრალდება ასევე არასრულწლოვანის განზრახ მკვლელობის მცდელობას შურისძიების მოტივით ედავება, ამბობს, რომ აღნიშნული განზრახვა არ ჰქონია. მისი ადვოკატი, ირაკლი ჩომახაშვილი „ჯი-ეიჩ-ენთან“ საუბარში აცხადებს, რომ მისი დაცვის ქვეშ მყოფს თბილისის ერთ-ერთ სკვერში თავს დაესხნენ და ის აუცილებელი მოგერიებით მოქმედებდა.
„მტკიცებულებებით იკვეთება, რომ ჩემი დავცის ქვეშ მყოფს, თავს დაესხნენ, მან დანა 3 პიროვნების წინააღმდეგ გამოიყენა, ეს იმას ნიშნავს, რომ ერთი მხრივ, საუბარი აუცილებელ მოგერიებაზეა, მეორე მხრივ კი, საუბარი შეიძლება იყოს ფარგლებს გადაცილებით ჯანმრთელობის განზრახ მძიმე დაზიანების მიყენებაზე და არა მკვლელობის განზრახვაზე“, - აცხადებს ჩომახაშვილი.
ის 19 დეკემბრის დღეს იხსენებს და ამბობს, რომ მისი დაცვის ქვეშ მყოფს თავს რომ დაესხნენ, ეს მოწმეთა ჩვენებებითაც იკვეთება.
„19 დეკემბერს, ჩემი დაცვის ქვეშ მყოფი და მისი მეგობარი თავისუფლებაზე, ერთ-ერთ სკვერში მიდიოდნენ. მეგობარს პლანშეტი ეკავა. მათ ოთხი ბიჭიდან ერთ-ერთი მიუახლოვდა და პლანშეტის წართმევა მოინდომა. შელაპარაკების დროს, ბრალდებულის მეგობარს სახეში გაარტყეს, რის ნიადაგზეც ჩხუბი დაიწყო. დაზარალებული ბრალდებულს თავს უკნიდან დაესხა და წააქცია, მას სამი პირი ცემდა, რა დროსაც ბრალდებულმა დანა ამოიღო და უკან მოქნევით სანტიმენრნახევრიანი ორი ჭრილობა მიაყენა, ფეხზე წამოდგა, წასვლას ცდილობდა, რა დროსაც მას ისევ დაუწყეს ფეხების რტყმა და უკან მოაბრუნეს. მან დაზარალებულს 2 სანტიმეტრიანი ერთი ჭრილობა მიაყენა. ამის შემდეგ სიტუაცია დამშვიდდა, დაზარალებული და ბრალდებული ერთმანეთის პირისპირ აღმოჩნდნენ, რა დროსაც ჩემი დაცვის ქვეშ მყოფი შემთხვევის ადგილიდან წამოვიდა, ანუ წინ ედგა, მაგრამ არ მოუკლავს. თუ შურისძიების მოტივი ჰქონდა, წინ როცა ედგა მოკლავდა“, - აცხადებს ადვოკატი.
მისი განმარტებით, არასრულწლოვანს შემამსუბუქებელი გარემოებები აქვს, რის გამოც მოსამართლეს აღკვეთის ღონისძიების სახით, პატიმრობა არ უნდა გამოეყენებინა.
„პატიმრობის საფუძველი არ არსებობს და ის 19 დეკემბრიდან მაინც პატიმრობაში იმყოფება. ამას გარდა, სახეზე ორზე მეტი შემამსუბუქებელი გარემოებაა, თან ის ნასამართლევი არ არის. შესაბამისად, მოსამართლეს უფლება აქვს კანონით გათვალისწინებულ სასჯელზე უფრო ნაკლები გამოიყენოს. ყველანაირი საფუძველი არსებობს, ის მოსამართლემ გაათავიუსფლოს, მაგრამ ასე არ იქცევა. გამოძიების ეტაპზე მოწმეთა მიერ მიცემული ჩვენებები ურთიერთსაწინააღმდეგოა, თუმცა, მათი ჩვენებითაც კი დასტურდება, რომ ეს ბავშვი აუცილებელი მოგერიებით მოქმედებდა“, - აღნიშნავს ჩომახაშვილი.
როგორც ის „ჯი-ეიჩ-ენთან“ განმარტავს, არასრულწლოვანი 9 წლიდან მუშაობს და დანაც სწორედ, სამსახურთან დაკავშირებული სამუშაოს ჩასატარებლად სჭირდებოდა.
„ჩემი დაცვის ქვეშ მყოფი 9 წლიდან მუშაობს, წეროვანში, საკმაოდ მძიმე სოციალურ პირობებში ცხოვრობს, დედამისს და პატარა ძმას ის არჩენდა, 5 წელი ჭურჭლის მრეცხავად მუშაობდა. ის დანაც, რომელიც მოგერიებისას გამოიყენა, კაბელების გასათლელად სჭირდებოდა, საერთოდ არ ფიქრობდა, რომ მას ადამიანის წინააღმდეგ გამოიყენებდა, მაგრამ რადგან თავს თაესხნენ, მეტი გზა არ დაუტოვეს. ვიმეორებ, არავის მოკვლის განზრახვა არ ჰქონია, ის მოგერიების ფარგლებში მოქმედებდა“, - აცხადებს ჩომახაშვილი.