“ჩვენი აზრით, მოსამართლემ განაჩენი ვერ დაასაბუთა”, - განუცხადა ჯი-ეიჩ-ენს“ მსახიობ გიორგი გიორგანაშვილის, იგივე ბახალას ადვოკატმა, გიორგი მახარაძემ. მისი განმარტებით, მოსამართლეს განაჩენში დაცვის მხარის პოზიციაზე ნამსჯელი არ აქვს.
გიორგანაშვილის ადვოკატმა თბილისის საქალაქო საამართლოს გამამტყუნებელი განაჩენი სააპელაციო სასამართლოში გასულ თვეს გაასაჩივრა. გამამართლებელი განაჩენის იმედი მასაც და ბახალასაც აქვს.
„განაჩენი გავასაჩივრეთ, ველოდებით სააპელაციო სასამართლოში სხდომა როდის ჩაინიშნება. უიმედოდ არ ვართ განწყობილი, გიორგიც საბრძოლო განწყობითაა. როგორც წესი, სააპელაციო სასამართლოში შანსები ნაკლებია ხოლმე, მაგრამ პირველი ინსტანციის განაჩენი იმდენად დაუსაბუთებელია, იმედი ნამდვილად გვაქვს, რომ სააპელაციო სასამართლო გამამართლებელ განაჩენს წარადგენს“, - აცხადებს მახარაზე.
ის „ჯი-ეიჩ-ენთან“ იმ გარემოებებზე საუბრობს, რომელზეც მოსამართლემ თავის განაჩენში მსჯელობა არ დააფუძნა.
„დასაბუთებულ განაჩენს ველოდებოდით, გვაინტერესებდა თუ რაზე დააფუძნა მოსამართლემ მსჯელობა. განაჩენში კი მას დაცვის მხარის პოზიციაზე პრაქტიკულად ნამსჯელი არ აქვს. შეგვიძლია ჩავთვალოთ, რომ სასამართლოს ბრალდების დადგენილება აქვს გადმოწერილი და 17 გვერდზე გავრცობილი.
დაკავებისას გიორგის ხელბარგი ჰქონდა, რომელიც საქმეში საერთოდ არ ჩანს. მოსამართლეს ამაზე ერთი სიტყვაც არ აქვს ნახსენები. ტაქსის მძღოლის ჩვენებაც ძალიან საინტერესოდ აქვს ინტერპრეტირებული, ძალიან უცნაური ფრაზები უწერია. სტრასბურგის ქეისი აქვს მოყვანილი, ოღონდ კონტექსტიდან ამოგლეჯილად, ფრაზები შუაში, თავის სასარგებლოდ აქვს გაწყვეტილი“, - აცხადებს მახარაძე.
შეგახსენებთ, რომ გიორგი გიორგანაშვილი გასული წლის 25 იანვარს დააკავეს. სასამართლომ ის 14 ივლისს 20 000-ლარიანი გირაოს სანაცვლოდ გაათავისუფლა.
23 იანვარს კი, ის პირდაპირ სასამართლოს დარბაზშივე დააკავეს, მოსამართლემ გიორგანაშვილს რვა წლით თავისუფლების აღკვეთა მიუსაჯა. გამოძიება მას განსაკუთრებით დიდი ოდენობით ნარკოტიკული საშუალების, „ბუპრენორფინის“ შემცველი 45 აბის და 4 აბის ნატეხის პირადი მოხმარების მიზნით შეძენა-შენახვას ედავებოდა.