თემირლან მაჩალიკაშვილის ოჯახის წევრები ხეობის მაცხოვრებლებთან ერთად უახლოეს მომავალში სადღეღამისო აქიციებს გამართავენ. როგორც „ჯი-ეიჩ-ენთან“ საუბარში მაჩალიკაშვილის ოჯახის ადვოკატი, მარიამ კუბლაშვილი აღნიშნავს, ოჯახს სამართლიანობის მისაღწევად მხოლოდ პროტესტის გზა დაუტოვეს.
„ბატონმა მალხაზ მაჩალიკაშვილმა განაცხადა, რომ აქციებს გეგმავენ, რადგან მათი უფლებები უხეშადაა დარღვეული. ისინი ფიქრობენ, იქნებ ქუჩაში გამოსვლით და პროტესტის ასეთი გზით მოძებნონ სამართლი, რადგან ამდენი ლოდინის მერე სამართალს ვერ ხედავენ. გამწარებულ ადამიანს სხვა რა გზა რჩება?“, - აცხადებს კუბლაშვილი.
შეგახსენებთ, რომ თემირლან მაჩალიკაშვილი პანკისში, სპეცოპერაციის დროს დაიჭრა და უგონო მდგომარეობაში რამდენიმე დღის განმავლობაში იმყოფებოდა, 11 იანვარს კი საავადმყოფოში გარდაიცვალა.
სუსის ინფორმაციით, პანკისის ხეობასა და თბილისში ჩატარებული სპეცოპერაციის დროს დაკავებული ხუთი მოქალაქე დაეხმარა აჰმედ ჩატაევს საქართველოს საზღვარზე გადმოსვლაში. დაკავებული პირები 21-22 ნოემბრის სპეცოპერაციის დროს დახოცილ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსზე.
