მგლის თავზე სახარების კითხვით და ასეთი წერილებით რუსეთის პოლიტიკა არ შეიცვლება., - ასე გამოეხმაურა „ევროპული საქართველოს“ ერთ-ერთი ლიდერი გიგა ბოკერია გიორგი კვირიკაშვილის რუსეთის ხელისუფლებისადმი მიმართვას.
მისი თქმით, საქართველოს ქვეყნის გარეთ და შიგნით თანმიმდევრული პოლიტიკა სჭირდება, გრძელვადიანი პოლიტიკა კონკრეტული კომპონენტებით.
„ეს მთავრობა, ივანიშვილის გუნდი მოვიდა დაპირებით, რუსეთთან ურთიერთობის დალაგებით. ეს იყო ცრუ დაპირება და ეს დადასტურდა. პირიქით იმ პოლიტიკამ, რომელიც მათ აწარმოეს დააზიანა საქართველო - ჩვენი საკითხის მაღალი დონის დღის წესრიგიდან მოხსნით.
ახლა მგლის თავზე სახარების კითხვით და ასეთი წერილებით რუსეთის პოლიტიკა არ შეიცვლება.
ჩვენ გვჭირდება ქვეყნის გარეთ და ქვეყნის შიგნით თანმიმდევრული პოლიტიკა, გრძელვადიანი პოლიტიკა კონკრეტული კომპონენტებით. ჩვენ „ევროპული საქართველოს“ შეთავაზებული გვაქვს ერთი კონკრეტული კომპონენტი „ოთხოზორია-ტატუნაშვილის სია“ და ველით პასუხს მმართველი გუნდისა", - განაცხადა ბოკერიამ, რომელმაც აქვე აღნიშნა, რომ საქართველოს ხელისუფლებას შეეძლო, რომ ჯერ კიდევ გიგა ოთხოზორიას მკვლელობის გამო რუსეთისთვის ძალიან ძვირი პოლიტიკური ფასი გადაეხდევინებინა, თუმცა ეს არ გააკეთა.
ცნობისთვის, საქართველოს პრემიერ-მინისტრი გიორგი კვირიკაშვილი რუსეთის ხელისუფლებას მიმართავს, რთული ვითარების დასაძლევად ერთობლივი ნაბიჯები გადაიდგას.
