ტონალობა მართალი გითხრათ, იყო სამარცხვინო, პირდაპირ რომ ვთქვათ, - ასე გამოეხმაურა „რესპუბლიკური პარტიის“ ერთ-ერთი ლიდერი დავით ზურაბიშვილი გიორგი კვირიკაშვილის რუსეთის ხელისუფლებისადმი მიმართვას.
მისი თქმით, გაუგებარია, ქვეყანამ რა დათმობები უნდა გაიღოს, როდესაც ჩვენი ტერიტორიები ოკუპირებულია და სეპარატისტული რეჟიმებია აღიარებული.
„ტონალობა მართალი გითხრათ იყო სამარცხვინო, პირდაპირ რომ ვთქვათ. აი, რომ იწუწუნებ ადამიანი: რომ ჩვენ კარგად ვიქცევით, ამისთვისაც მზადა ვართ, იმისთვისაც მზადა ვართ და აი, ამას რატო მიკეთებ? ყველაზე ცუდი, რაც კი რუსეთთან მიმართებაშია ეს არის დაყვავებითა და ენის მოჩლექით ლაპარაკი. რა თქმა უნდა, არ გაამართლა ამან და ვერც გაამართლებს, მაგრამ დასკვნები ვერ გამოაქვს ხელისუფლებას და პრაქტიკულად აგრძელებს იმავეს. ამ მიმართვაში ჩვენ ვერაფერი ახალი ვერ დავინახეთ, თუ დავინახეთ რამე უფრო ის, რომ ჩვენ მზად ვართ რაღაც გაუგებარი დათმობებისთვის და მე არ ვიცი, რა დათმობები უნდა გაიღოს, როდესაც ჩვენი ტერიტორიები ოკუპირებულია და სეპარატისტული რეჟიმებია აღიარებული. იქ საერთოდ რა უნდა დათმოს საქართველომ, წარმოდგენა არ მაქვს. რა უნდა დათმოს იმ დროს, როცა მიცვალებულის ცხედარს არ აძლევენ?“, - განაცხადა ზურაბიშვილმა.
ცნობისთვის, საქართველოს პრემიერ-მინისტრი გიორგი კვირიკაშვილი რუსეთის ხელისუფლებას მიმართავს, რთული ვითარების დასაძლევად ერთობლივი ნაბიჯები გადაიდგას.
