პირველ რიგში, მოწოდება, რომელიც გაკეთდა პრემიერ-მინისტრის მიერ, უკავშირდება იმას, რომ ამ რთული მდგომარეობიდან მოვძებნოთ გამოსავალი, - ასე გამოეხმაურა საქართველოს საგარეო საქმეთა მინისტრი მიხეილ ჯანელიძე გიორგი კვირიკაშვილის რუსეთის ხელისუფლებისადმი მიმართვას.
მისი თქმით, ძალიან მნიშვნელოვანია, რომ ჟენევის საერთაშორისო დისკუსიებში მოხდეს გამოსავლის პოვნა.
"ჩვენ ტატუნაშვილის საკითხთან დაკავშირებით მოვახდინეთ საერთაშორისო საზოგადოების მაქსიმალური მობილიზება. დაფიქსირდა ყველა საერთაშორისო ორგანიზაციის მხრიდან შესაბამისი პოზიციები. ძალიან მნიშვნელოვანია, რომ ჟენევის საერთაშორისო დისკუსიებში შევძლოთ გამოსავლის პოვნა. რუსეთმა უნდა უპასუხოს საერთაშორისო საზოგადოების მოთხოვნას და საერთაშორისო სამართლის პრინციპების შესაბამისად, მოიძებნოს შესაბამისი გამოსავალი“, – განაცხადა მიხეილ ჯანელიძემ.
ცნობისთვის, საქართველოს პრემიერ-მინისტრი გიორგი კვირიკაშვილი რუსეთის ხელისუფლებას მიმართავს, რთული ვითარების დასაძლევად ერთობლივი ნაბიჯები გადაიდგას.