„მოსამართლეების ნაცვლად, ჩვეულებრივი მონები ჰყავთ და რაც აწყობთ, იმას გააკეთებენ. შესაბამისად, სულაც არ ველოდები, რომ მოსამართლე სასჯელს შეცვლის. შესაძლოა, ბაჩოს სასჯელი გაუზარდონ. ის ციხიდან 2020 წლის გაზაფხულზე გამოდის, მისი გამოსვლა გაზაფხულზე ვის აწყობს, როცა 2020 წლის შემოდგომაზე არჩევნებია? შესაბამისად, გადათვლიან-გადმოთვლიან და როგორც აწყობთ, ისე გააკეთებენ“, - განუცხადა „ჯი-ეიჩ-ენს“ მსჯავრდებული ყოფილი მაღალჩინოსნის, ბაჩო ახალაიას მეუღლემ და ადვოკატმა, ანი ნადარეიშვილმა.
თბილისის სააპელაციო სასამართლოში დღეს, 16:00 საათზე ე.წ. ნავთლუღის სპეცოპერაციის და პატიმრების წამების საქმეზე პროცესია ჩანიშნული, რომელსაც ახალაია არ დაესწრება. ის პროტესტის ნიშნად პროცესებს დაახლოებით, ერთი წელია არ ესწრება.
„არაფერს აქვს აზრი, რადგან სასამართლო არ არსებობს, ამიტომაც არ დავდივართ პროცესებზე. ჩვენი სიმართლე დავამტკიცეთ, 13-ჯერ გავმართლდით და კაცი მაინც ციხეშია“, - დასძენს ნადარეიშვილი.
როგორც ის განმარტავს, საქმე „შეთითხნილია“ და ქართული მართლმსაჯულების სამართლიანობის იმედი არ აქვს. ადვოკატები ახლაიას საქმეს სტრასბურგის სასამართლოსთვის ამზადებენ.
„ბრალი შეთითხნილია. საქმე სააპელაციო სასამართლოში მეოთხე წელია მიმდინარეობს, არადა, ოთხ თვეში უნდა დამთავრებულიყო. დროს მაქსიმლაურად ჭიმავენ, რომ საქმე სტრასბურგში არ წავდიეს. მერე ალბათ, უზენაესში გაჭიმავენ კიდევ ოთხი წელი და ა.შ. ეს არის ისეთი საქმე, რომელიც თავზე დაემხობათ. ნამდვილი მოსამართლე ასეთ საქმეს წარმოებაში არც მიიღებდა.
მოსამართლე ბუგიანიშვილმა, ბაჩოსთან მიმართებაში განაცხადა, სავარაუდო დამნაშავეო, ამით ყველაფერი ნათქვამია. ამას გარდა, დაზარალებულები სხვადასხვა ჩვენებას იძლეოდნენ, ზოგი ამბობდა ფეხი დამარტყაო, ზოგი ამბობდა, ავტომატი ჩამარტყაო. ერთ-ერთი მათგანი ჩვენთან მოვიდა და თქვა, რომ ჩვენება ზეწოლის შედეგად მიაცემინეს. მეორე ადამიანმა კი, მიმდინარე ამბის დროს, ყაჩაღობა ჩაიდინა, ადვოკატი ლილი გელაშვილი დააყაჩაღა, მაგრამ არ დაიჭირეს, პოლიციაში ტრაბახომდა, ახალაიას საქმეზე ოქროს მოწმე ვარო“, - აცხადებს ნადარეიშვილი.
ცნობისთვის, ე.წ. ნავთლუღის სპეცოპერაციის საქმეზე ბაჩანა ახალაისთან ერთად, მეგის ქარდავა, ლევან ქარდავა და გიორგი მაზმიშვილი არიან მსჯავრდებულები. მათგან ორს, ლევან ქარდავასა და გიორგი მაზმიშვილს, ნავთლუღის სპეცოპერაციის ღამეს საკონტროლო გასროლით 3 ახალგაზრდის - მურად გორგაძის, რომან სურმანიძისა და მარად ართმელაძის - მკვლელობა ედებათ ბრალად. ბაჩო ახალაია და მეგის ქარდავა კი ნავთლუღის სპეცოპერაციის საქმის ერთ-ერთ ეპიზოდში, რუსთავის ნომერ პირველ დაწესებულებაში პატიმრების ცემაზე არიან მსჯავრდებულები.
