თბილისის სააპელაციო სასამართლოში დღეს, ე.წ. ნავთლუღის სპეცოპერაციის და პატიმრების წამების საქმეზე დაცვის მხარე დასკვნით სიტყვას წარმოთქვამს. ამის შესახებ „ჯი-ეიჩ-ენს“ ერთ-ერთი მსჯავრდებულის, ბაჩო ახალაიას ადვოკატმა, მალხაზ ველიჯანაშვილმა განუცხადა.
თბილისის სააპელაციო სასამართლოში პროცესი დღეს, 16:00 საათზეა ჩანიშნული. პროცესს არ დაესწრება მსჯავრდებული ბაჩო ახალაია, ის თითქმის ერთი წელია, პროტესტის ნიშნად საქმის განხილვას არ ესწრება.
„დღევანდელ პროცესზე დაცვის მხარე დასკვნით სიტყვას იტყვის. დასკვნითი სიტყვა ამდაგვარად გადავანაწილეთ: დღეს გიორგი მაზმიშვილის ადვოკატი წარმოთქვამს დასკვნით სიტყვას. მომდევნო პროცესზე კი, რომელიც თვის ბოლოსაა ჩანიშნული, ბაჩო ახალიას და მეგის ქარდავას ადვოკატი, ანუ მე ვიტყვი დასკვნით სიტყვას“, - აცხადებს ველიჯანაშვილი.
მისი განმარტებით, საქმე გაყალბებულია და სამართლიანი განაჩენის მოლოდინი არ აქვს.
„ეს საქმე თავიდან ბოლომდე გაყალბებულია, შესაბამისად, სასამართლოს იმედი არ გვაქვს. ძნელია, ამ ინსტანციაში და საერთოდ, საქართველოს სასამართლოში სამართლიანობის მიღწევა. შესაბამისად, ჩვენ გათვლები სტრასბურგის სასამართლოზე გვაქვს, ამისთვის საქმეს აქტიურად ვამზადებთ“, - განაცხადა ველიჯანაშვილმა.
ცნობისთვის, ე.წ. ნავთლუღის სპეცოპერაციის საქმეზე ბაჩო ახალაისთან ერთად, მეგის ქარდავა, ლევან ქარდავა და გიორგი მაზმიშვილი არიან მსჯავრდებულები. მათგან ორს, ლევან ქარდავასა და გიორგი მაზმიშვილს, ნავთლუღის სპეცოპერაციის ღამეს საკონტროლო გასროლით 3 ახალგაზრდის - მურად გორგაძის, რომან სურმანიძისა და მარად ართმელაძის - მკვლელობა ედებათ ბრალად. ბაჩო ახალაია და მეგის ქარდავა კი ნავთლუღის სპეცოპერაციის საქმის ერთ-ერთ ეპიზოდში, რუსთავის ნომერ პირველ დაწესებულებაში პატიმრების ცემაზე არიან მსჯავრდებულები.
