თბილისის საქალაქო სასამართლოში ხუთ საათზე მეტხანს გაგრძელდა ხორავას ქუჩაზე მომხდარი მკვლელობის საქმეზე ორი მოწმის დაკითხვა. საქმის პროკურორის ზვიად ფხაკაძის განცხადებით, მოწმეთა ჩვენებები შეცვლილი არ არის და ისინი განსხვავებულ ფაქტობრივ გარემოებებზე არ საუბრობენ.
„დღეს დაკითხული მოწმეების მიერ სასამართლოსთვის მოწოდებულ ინფორმაციას ბრალდების მხარე, დასკვნით სიტყვაში აუცილებლად გამოიყენებს. გვაქვს მოლოდინი, რომ ხსენებული ჩვენებები გამამტყუნებელი განაჩენის გამოტანას დაედება საფუძვლად. დადასტურებულად შემიძლია გითხრათ, რომ სასამართლზე არცერთ მოწმეს ჩვენება არ შუცვლია და არცერთი მოწმე განსხვავებულ ფაქტობრივ გარემოებებზე არ საუბრობს. სასამართლოზე დაკითხული მოწმეები საუბრობენ იმ დეტალებზე, რაც რეალურად მოხდა. კიდევ ერთხელ ვიმეორებ, ჩვენებები რეალურად შეცვლილია თუ არა, მხოლოდ სასამართლომ უნდა შეაფასოს. შესაბამისად, ბრალდების მხარე იმის მოლოდინი აქვს რომ სასამართლოში გამოკლვლეული მტკიცებულებები გამამტყუნებელ განაჩენს დაედება საფუძვლად“ - აცხადებს ფხაკაძე.
ის ჟურნალისტებთან დაცვის მხარის ბრალდებას, რომ მოწმეებს ბრალდების მხარე ამეცადინებს ჩვენებების მისაცემად კიდევ ერთხელ პასუხობს და ამბობს, რომ მსგავს ფაქტს ადგილი არ აქვს და რომ მოწმეების სასამართლოზე წარმოდგენა კანონმდებლობით დადგენილი წესით ხდება. მისთვის გაუგებარია თუ რას ეფუძნება დაცვის მხარის აღნიშნული ბრალდება.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
