მოზარდების მკვლელობის საქმის ადვოკატი „ჯი-ეიჩ-ენთან“ საუბარში აცხადებს, რომ დღეს დაკითხულმა ორმა მოწმემ სასამართლოს ძალიან მნიშნელოვანი ინფორმაცია მიაწოდა.
„ეს იყო ერთ-ერთი ყველაზე მნიშვნელოვანი ჩვენება რომელიც აქამდე მიგვიღია. მიგვაჩნია, რომ დღევანდელი ჩვენებებით კიდევ უფრო მეტად გახდა ცხადი, რომ მოწმეთა ჩვენებები არადამაჯერებელია და საქმე არასწორად გამოძიებული. დანამდვილებით შემიძლია გითხრათ, რომ ყველა დაკითხული მოწმის ჩვენება, უამრავ დეტალთან დაკავშირებით, ერთმანეთს ეწინააღმდეგება. დღეს დაკითხულმა მოწმეებმა ისაუბრეს თუ როგორ დაიწყო ჩხუბი, როგორ განვითარდა კონფლიქტი, სად იმყოფებოდნენ და როგორ დასრულდა ეს ყველაფერი. ვიმეორებ აღნიშნული მოწმეების ჩვენებები უამრავ დეტალთან მიმართებაში ერთმანეთს არ ემთხვევა“ - აცხადევბს ტარიელ კაკაბაძე.
დღევანდელ სასამართლო პროცესზე ბრალდების მხარის მხოლოდ ორი მოწმე დაიკითხა. შემდეგი სასმართლო პროცესი 14 მარტს 10:30 საათზე ჩაინიშნა. შემდეგი სასამართლო პროცესები აღნიშნული საქმის მოსამართლის დროის უქონლობის გამო, უზენაეს სასამართლოს შენობაში გადაინაცვლებს.
შეგახსენებთ, რომ ხორავას ქუჩაზე, 2017 წლის პირველ დეკემბერს ორი მოზარდი დაჭრეს. ერთი მათგანი, ლევან დადუნაშვილი საავადმყოფოში მიყვანამდე გარდაიცვალა, მეორე - დავით სარალიძე კი, მოგვიანებით, საავადმყოფოში. მომხდარი მკვლელობის ფაქტზე სამართალდამცავებმა 2 დეკემბერს, ერთი არასრულწლოვანი დააკავეს და ბრალი განზრახ მკვლელობის მუხლით წაუყენეს. მეორე არასრულწლოვანს კი ბრალი დაუსწრებლად წარუდგინეს. სასამართლომ ორივე ბრალდებულს აღკვეთის ღონისძიების სახით, პატიმრობა შეუფარდა. პროკურატურამ მკვლელობის საქმეზე, დანაშაულის შეუტყობინებლობის ბრალდებით პასუხისგებაში 5 პირი მისცა, რომელთა შორის, ორი მოსწავლის მშობელი და შსს-ს ყოფილი თანამშრომელია. პასუხისგებაში მიცემულთაგან მხოლოდ სამი დააკავეს, რადგან ორ პირზე არასრულწლოვანთა მართლმსაჯულების კოდექსი ვრცელდება.
