"შემხვდეს მეუფე იაკობი და მითხრას, ცილს რატომ მწამებს და დაამტკიცოს ის, რაც ტელევიზიით თქვა. მე ჩემი ავტორიტეტი და საქმიანი რეპუტაცია მაქვს. ამ კაცმა ყველაფერს თავი აარიდა,“ ჯი-ეიჩ-ენის“ საშუალებით, კიდევ ერთხელ ვითხოვ საეკლესიო სასამართლო შედგეს, წმინდა სინოდის წევრები მოიწვიონ. საპატრიარქოს სამდივნომ, ბოტკოველია თუ თეთრუაშვილი, კეთილი ინებონ და ჩემს წერილზე პასუხი გამცენ", - აცხადებს დეკანოზ გიორგი მამალაძის ადვოკატი ,მიხეილ რამიშვილი, რომელმაც თბილისის საქალაქო სასამართლოში სარჩელი შეიტანა მეუფე იაკობის მიერ მისი პატივის, ღირსებისა და საქმიანი ღირსების შელახვის გამო.
ადვოკატის განმარტებით, მეუფე იაკობი მზად იყოს, რომ საკუთარი ნათქვამი დაამტკიცოს.
„მოგეხსენებათ, 21 სექტემბერს ტელეკომპანია "იბერიას" ეთერით მეუფე იაკობმა საჯაროდ, ცილი დამწამა. მან მეუფე პეტრესთან მაბეზღარობაში დამდო ბრალი და სანდრო გირგვლიანის საქმეში კუდ-ის იმჟამინდელი უფროსის, დავით ახალაიას მიერ ჩანერგილი პროვოკატორ-ინფორმატორი მიწოდა. ამის შემდეგ, ის ჩემთვის არანაირ ავტორიტეტს არ წარმოადგენს და უსახელოც დავარქვი. მიუხედავად ჩემი არაერთი მცდელობისა, მიწერილი მოკლეტექსტური შეტყობინებებისა, შუამავალი მამაოებისა, რომ მეუფე იაკობი შემხვედროდა, დამლაპარაკებოდა თუ რაში მდებდა ბრალს, მისი მხრიდან აბსოლუტურად არანაირი რეაგირება არ მომხდარა. ამის შემდეგ, 20 ოქტომბერს, თბილისის საქალაქო სასამართლოში სარჩელი შევიტანე, მაგრამ რატომღაც, მისი განხილვა დღემდე არ მომხდარა",-განაცხადა მიხეილ რამიშვილმა და აღნიშნა, რომ მან უკვე საქმის დაჩქარებაზეც შეიტანა განაცხადი, რადგან ეს ისეთი საქმე არაა, რომ მის განხილვას თვეები და წლები დასჭირდეს.
„ეს არის ჩემი პატივის, ღირსების და საქმიანი რეპუტაციის შელახვა. მომდევნო კვირას სასამართლოს დაჩქარებულად განხილვის განცხადებით ისევ მივმართავ. 5 დეკემბერს, პატრიარქს წერილით მივმართე, რომელშიც კითხვითი ფორმით, განმარტება ვითხოვე, როცა მაღალი იერარქიული სასულიერო პირი სხვას საჯაროდ ცილს სწამებს, ამ შემთხვევაში, ეს ჩემს მიმართ განხორციელდა, მაინტერესებს, რა სახის სასჯელია გათვალისწინებული? არსებობს საეკლესიო სასამართლო, კანონიკური სამართლისა და რჯულის კანონის თანახმად, ბრალის წამყენებელმა უნდა დაამტკიცოს მის მიერ წაყენებული ბრალი.წინააღმდეგ შემთხვევაში, თურმე ის სახელი და სტატუსი, რასაც მე მიწოდებს, მასზე გადადის. ჩემი წერილი სამდივნოს ხელში იყო და ღრმად ვარ დარწმუნებული, რომ სამდივნო თავს არ იწუხებს რომ წერილზე პასუხი გამცეს. ვიმეორებ, ვიკითხე ეკისრება თუ არა მას სასჯელი. ამავდროულად, ვალდებულია თუ არა, მეუფე იაკობი დაამტკიცოს საეკლესიო სასმართლოს წინაშე, საჯარო ცილისწამება. ამ სასამართლოზე ამ ადამიანმა მისი ცილისწამება ან დაამტკიცოს, ან უარყოს. იმ ადამიანს სურდა, ჩემი ავტორიტეტი და ჩემ მიმართ ხალხის ნდობა მოესპო. განცხადებები სამდივნოში ვის ხელშიცაა, კარგადაც აქვთ წაკითხული და უჯრაშიც ჩადებულ-შენახული.1 თვეა ვითხოვ პასუხს, ეკისრება თუ არა რაიმე სასჯელი ცილისმწამებელს. ვიცი, რომ საპატრიარქოს სამდივნოსთვის ჩემი პიროვნება არაფერს წარმოადგენს, შორენა თეთრუაშვილისთვის, იაკობისთვის და კიდევ ბევრისთვის მიუღებელი პერსონა ვარ, მაგრამ ეს მათი პრობლემაა, ჩემი არა“, - აცხადებს მიხეილ რამიშვილი „ჯი-ეიჩ-ენთან“ საუბრისას.
