„სამართალდამცავთა რეფორმირების ცენტრის“ ხელმძღვანელი ზვიად კუპრავა დღეს პროკურატურაში ბუტა რობაქიძის დედის, ია მეტრეველის ფონდ „ქომაგის“ წარსულ საქმიანობასთან დაკავშირებით დაიბარეს. სწორედ აღნიშნული ფონდის წარსული საქმიანობის შესწავლის განცხადებით მიმართა კუპრავას ორგანიზაციამ პროკურატურას. ის სამართლადამცავ უწყებაში 11 საათზე გამოცხადდა.
„დაახლოებით ორი კვირის წინ, ჩვენმა ორგანიზაციამ „სამართლადამცავთა რეფორმირების ცენტრმა“ პროკურატურაში განცხადება შევიტანეთ, რათა ფონდ „ქომაგის“ წარსული საქმიანობა შესწავლილიყო, რომლის დირექტორიც ქალბატონი ია მეტრეველი გახლდათ.
ვინაიდან პროკურატურა მაღალ ინტერესს გამოხატავდა ფონდების საქმიანობასთან დაკავშირებით, გადავწყვიტეთ, სხვადასხვა ფონდების საქმიანობის შესწავლა, მათ შორის, ფონდ „ქომაგის“ და არაერთი დარღვევა აღმოვაჩინეთ,ფინანსური დარღვევებიც, დოკუმენტური მასალები და მტკიცებულებები პროკურატურას მივაწოდე. თუკი „იავნანას“ შესწავლა მიმდინარეობს, რატომ არ უნდა შესწავლილიყო ფონდი "ქომაგი"? როგორც ჩანს, პროკურატურა ჩვენ მიერ მიწოდებული მასალებით დაინტერესდა და დღეს სწორედ ამ საქმეზე, პროკურატურაში ვარ დაბარებული. პროკურორს დამატებით მასალებს და მტკიცებულებებს მივაწვდი. ასევე, კონკრეტული მოწმეების სახელებსა და გვარებს, რომლებიც მზად არიან, პროკურატურას ჩვენება მისცენ. ეს ადამიანები ფონდ „ქომაგის“ თაღლითობის მსხვერპლნი გახდნენ“, - განუცხადა „ჯი-ეიჩ-ენს“ ცენტის ხელმძღვანელმა, ზვიად კუპრავამ.
