"სამწუხაროა, რომ ამ ქვეყნის ყოფილი პრეზიდენტი სასამართლომ დამანაშავედ ცნო, თუმცა წმინდა სამართლებრივად, ეს საქმე ერთგვარ პრევენციად უნდა გადაიქცეს, მიუხედავად სახელმწიფო პოლიტიკური თანამდებობის პირების იერარქიული მდგომარეობისა, მიუხედავად უფლებამოსილებისა, ისინი კანონის წინაშე თანასწორი არიან", - ამის შესახებ პროკურორმა ირაკლი ნადარეიშვილმა მას შემდეგ განაცხადა, სასამართლომ მიხეილ სააკაშვილი სანდრო გირგვლიანის მკვლელობის საქმის ერთ-ერთ ეპიზოდზე დამნაშავედ ცნო.
"ბრალდების მხარეს ჰქონდა მოლოდინი, რომ გამამტყუნებელი განაჩენი დადგებოდა ასევე მინდა მოგახსენოთ, რომ სწორედ სტრასბურგის გადაწყვეტილება გახდა საფუძველი, რომ გირგვლიანის საქმეზე ჩატარებულიყო ხელახალი გამოძიება. სტრასბურგის გადაწყვეტილების აღსრულებაზე კონტროლი დაევალა ევროსაბჭოს მინისტრთა კაბინეტს და მისი ზედამხედველობის და კონტროლის ქვეშ იქნა ის გამოძიება, რომლის შედეგების მიხედვითაც, გირგვლიანის საქმეზე უკვე 8 პირის მიმართ არის გამამტყუნებელი განაჩენი გამოტანილი. მათ შორის სააკაშვილის, იმჟამინდელი შინაგან საქმეთა მინისტრის, ვანო მერაბიშვილის, ბაჩო ახალაიას და სხვა მაღალჩინოსნების მიმართ. რაც შეეხება ამ საქმეს, მას ორი მხარე აქვს, ერთი, რა თქმა უდნა, ადამიანური მხარეა და სამწუხაროა, რომ ამ ქვეყნის ყოფილი პრეზიდენტი სასამართლომ დამნაშავედ ცნო, როგორც ფაქტი ეს ნამდვილად სამწუხაროა, მაგრამ არის მეორე, წმინდა სამართლებრივი მხარე და ეს საქმე ერთგვარ პრევენციად უნდა გადაიქცეს, მიუხედავად სახელმწიფო პოლიტიკური თანამდებობის პირების იერარქიული მდგომარეობისა, მიუხედავად უფლებამოსილებისა, ისინი კანონის წინაშე თანასწორი არიან. უფლებამოსილების ბოროტად გამოყენების შემთხვევაში ყველა, კანონის თანახმად, პასუხისგებაში მიეცემა", - განაცხადა საქმის პროკურორმა, ირაკლი ნადარეიშვილმა.
კითხვაზე, თუ რატომ მოხდა პრეზიდენტის გასამართლება მისთვის კონსტიტუციის მინიჭებული უფლების შეწყალების გამოყენების გამო , პროკურორი პასუხობს, რომ ის ამის გამო არ გასამართლებულა.
"ცდებით და საზოგადოებაც შეცდომაში შეგყავთ, პრეზიდენტი პასუხისგებაში მიცემული და გასამართლებული იქნა და მას უკვე მსჯავრდებულის სტატუსი არა შეწყალების გამო, არამედ სამსახურებრივი უფლებამოსილების ბოროტად გამოყენების გამო აქვს. ეს ორი აბსოლუტურად სხვადასხვა ცნებაა", - განაცხადა პროკურორმა.
შეგახსენებთ, რომ დღეს მოსამართლე გიორგი არევაძემ მიხეილ სააკაშვილი სანდრო გირგვლიანის მკვლელობის საქმის ერთ-ერთ ეპიზოდზე დამნაშავედ ცნო და სამი წლით თავისუფლების აღკვეთა მიუსაჯა.