მიხეილ სააკაშვილის ადვოკატის შეფასებით, დღეს დაირღვა საქართველოს კონსტიტუცია.სოფიო გოგლიჩიძის განცხადებით, მოსამართლე გიორგი არევაძის გადაწყვეტილებით, არაერთი სამართლებრივი ნორმა დაირღვა.
,,მიხეილ სააკაშვილის მიმართ პოლიტიკური დევნა მიმდინარეობს. შეუძლებელი იყო, რომ საქმეში არსებული მტკიცებულებებით გამამტყუნებელი განაჩენი დამდგარიყო, რომ არ ყოფილიყო კანონს მიღმა გადაწყვეტილებები მიღებული“, - განაცხადა ადვოკატმა. მისივე თქმით, გაურკვეველია თუ რასზე დაყრდნობით მიიღო გადაწყვეტილება მოსამართლემ, ვინაიდან სამოტივაციო ნაწილი მხარეებისთვთის ჯერჯერობით უცნობია.
გოგლიჩიძემ აღნიშნა, რომ მას მიხეილ სააკაშვილთან კომუნიკაცია არ ჰქონია და შესაბამისად, მისთვის უცნობია, თუ რა გადაწყვეტილებას მიიღებს ის განაჩენის გასაჩივრებასთან დაკავშირებით.
თბილისის საქალაქო სასამართლოში საქართველოს ყოფილი პრეზიდენტის, მიხეილ სააკაშვილის საქმეზე განაჩენი გამოცხადდა.
მოსამართლე გიორგი არევაძემ ის დამნაშავედ მიიჩნია და 3 წლის ვადით თავისუფლების აღკვეთა მიუსაჯა.
შეგახსენებთ, რომ მიხეილ სააკაშვილს სახელმწიფო ბრალდება სანდრო გირგვლიანის მკვლელობის საქმის ერთ-ერთ ეპიზოდზე უფლებამოსილების ბოროტად გამოყენებას ედავებოდა.
აღნიშნულ საქმეზე სასამართლო პროცესები თითქმის, 5 წლის განმავლობაში მიმდინარეობდა.