რამდენიმე წუთის წინ, თბილისის საქალაქო სასამართლოში საქართველოს ყოფილი პრეზიდენტის, მიხეილ სააკაშვილის სასამართლო პროცესი დასრულდა. სახელმწიფო ბრალდება მას გირგვლიანის მკვლელობის საქმის ერთ-ერთ ეპიზოდზე უფლებამოსილების ბოროტად გამოყენებას ედავება.
საზოგადოებრივი ადვოკატის შუამდგომლობა, პროცესის 15 იანვრამდე გადადების შესახებ მოსამართლემ არ დააკმაყოფილა და შემდეგი სხდომა 25 დეკემბერს დანიშნა.
როგორც ადვოკატმა პროცესის დასრულების შემდეგ აღნიშნა, ერთკვირიან ვადაში, შეუძლებელი იყო, საქმის მასალების გაცნობა და დასკვნითი სიტყვის მომზადება მოესწრო.
"საქმე საკმაოდ რთულია, მოცულობითია, აქედან გამომდინარე, ერთკვირიან ვადაში შეუძლებელი იყო მასალებს გავცნობოდი და ამასთანავე, დასკვნითი სიტყვა მომემზადებინა. ამას გარდა, სხვა , არაერთ საქმეში მივიღე მონაწილეობა. სხვა ბრალდებულების ინტერესები ისევე უნდა დამეცვა, როგორც ამ საქმეში. თუნდაც მხოლოდ ამ საქმეზე მემუშავა, ერთკვირიან ვადაში, შეუძლებელი იყო, საქმის მასალების გაცნობა და დასკვნითი სიტყვის მომზადება მომესწრო“, - განაცხადა სოფიო გოგლიჩიძემ.
შეკითხვაზე, იქნება თუ არა მისთვის საკმარისი მოსამართლის მიერ მიცემული ორდღიანი ვადა საქმის მასალების გასაცნობად და დასკვნითი სიტყვის მოსამზადებლად, ადვოკატი განმარტავს, რომ ეს ვადა საკმარისი არ არის და წინააღმდეგ შემთხვევაში, ის სხდომის 15 იანვრამდე გადადებას არ მოითხოვდა.
იმ შემთხვევაში თუ გოგლიჩიძე 25 დეკემბრამდე ვერ მოასწრებს მასალების გაცნობას, მოსამართლეს კვლავ მიმართავს სხდომის გადადების შუამდგომლობით.
„თუ ვერ მოვასწარი, რა თქმა უნდა, შუამდგომლობას დავაყენებ იმისათვის, რომ ბრალდებულის ინტერესები სრულყოფილად იყოს დაცული. რა თქმა უნდა, დაცვის უფლება იზღუდება, როგორ შეიძლებოდა ერთ კვირაში 35 სასამართლო სხდომის ოქმი მომესმინა და 2000 გვერდს გავცნობოდი“, - განმარტა ადვოკატმა.
რაც შეეხება მოსამართლის წარმოთქმულ რეპლიკას, რომ შემდეგ პროცესზე ის ოროსანი ბავშვივით არ გამოცხადებულიყო, გოგლიჩიძე რეაგირებას გეგმავს.
„რა თქმა უნდა შეურაცხყოფილად ვიგრძენი თავი. ამას ნამდვილად არ ველოდი, მან კარგად იცის ჩემი პრაქტიკა, ჩვენ არაერთ პროცესზე შევხვედრივართ და ცხადია, ამაზე რეაგირებას მოვახდენ“, - განაცხადა სოფიო გოგლიჩიძემ.
შეგახსენებთ, 14 დეკემბერს, თბილისის საქალაქო სასამართლოში საქართველოს ყოფილ პრეზიდენტს, მიხეილ სააკაშვილს საზოგადოებრივი ადვოკატი დაენიშნა. სააკაშვილმა ქართულ მართლმსაჯულებას უნდობლობა გამოუცხადა და შეთანხმებით აყვანილ ადვოკატებზე უარი განაცხადა.
