„მე არ ვარ არც ბუტა რობაქიძის მკვლელობაში და არც იარაღების მიტანაში ბრალდებული“, - ამის შესახებ „ჯი-ეიჩ-ენს“ ბუტა რობაქიძის მკვლელობის საქმეზე ერთ-ერთმა ბრალდებულმა, გურამ დონაძემ, დღევანდელი სასამართლო პროცესის დაწყებამდე განუცხადა.
მისივე მტკიცებით, პატრულ-ინსპექტორები, ხელახალი გამოძიების პირობებში, ცრუ მოწმეები არიან.
„პროკურატურის დადგენილებაში წერია - ჩაიდინა მოხელის მიმართ სამსახურეობრივი უფლებამოსილების ბოროტად გამოყენება, საჯარო ინტერესის საწინააღმდეგოდ - ეს არის ჩემი ბრალდება. მე არ ვარ ბუტა რობაქიძის მკვლელობაში ბრალდებული და მე არ ვარ იარაღების მიტანაში ბრალდებული. რაც შეეხება აქამდე მოყვანილ მოწმეებს, არცერთ მოწმეს ვინმე კონკრეტული პირი არ დაუსახელებია, თუ ვინ მიიტანა ის იარაღი და ვინ დაალაგა. ისინი არ ამბობენ, რომ იარაღი დალაგებულია, აცხადებენ, რომ მივედით, იარაღი არ იყო და მერე იყო. პატრულ-ინსპექტორებმა ძალიან კარგად იციან, რომ იქ იარაღი იყო, უბრალოდ, ხელახალი გამოძიების პირობებში, ისინი არიან ცრუ მოწმეები. ასე აწყობდა კბილაშვილის პროკურატურას და ასე მიდის ეს საქმე.
კადრებით, ჩვენ ვადასტურებთ, რომ სანამ ბუტა რობაქიძე ცოცხალია და სუნთქავს, შემთხვევის ადგილზე არის ცეცხლსასროლი იარაღი. ამ კადრების მოპოვება ნებისმიერს შეუძლია, youtube-ზე არის ატვირთული. წინ კიდევ 80 მოწმეა დასაკითხი და ძალიან მოულოდნელი მოწმეებიც შეიძლება აღმოჩნდნენ, რომელებიც პირდაპირ დაადასტურებენ, რომ იარაღები იყო იქამდე, სანამ ბუტა რობაქიძე დაჭრილი სუნთქავდა და იყო ცოცხალი. მე რაც ვნახე, ჩვენებაშიც ის დავწერე, როცა მივედი, იქ იარაღები ვნახე.“, - განმარტავს გურამ დონაძე.
ცნობისთვის, თბილისის საქალაქო სასამართლოში ბუტა რობაქიძის მკვლელობის საქმის განხილვა ამ წუთებში განახლდა.
