მე არ ვარ რაღაც პირუტყვი, რომ ხელ-ფეხ შეკრული ჩვეულებრივად ჩავბარდე და სადღაც წამიყვანონ, - ამის შესახებ პარტია „ახალი ძალების მოძრაობის“ ლიდერმა მიხეილ სააკაშვილმა გადაცემა "არჩევანში" განაცხადა.
საქართველოს ყოფილი პრეზიდენტი უკრაინის პროკურატურის მიერ მის მიმართ წაყენებულს ბრალეულობებს „იდიოტურს“ უწოდებს.
„აუდიოჩანაწერის შექმნას, რაღაც 3-წუთიანის საერთოდ არაფერი სჭირდება აწყობას. ვიცოდი, რომ აწყობდნენ. წინა კვირას გავაკეთე განცხადება, რომ აწყობენ ჩემი სხვადასხვა სატელეფონო მოსმენიდან ერთ ჩანაწერს და ეს გააკეთეს კიდევაც დღეს“, - აღნიშნა სააკაშვილმა.
მისივე თქმით, უკრაინელები ამ ჩანაწერის რეალობას არ დაიჯერებენ.
„უკრაინაში ამას არავინ არ „ჭამს.“ ამ ორგანოებს არავინ არ ენდობა, იციან, რა მატყუარები არიან და რაზე არიან წამსვლელები“, - აღნიშნა მიხეილ სააკაშვილმა, რომელმაც აქვე დასძინა, რომ ბევრი დეპუტატი უჭერს მხარს, რომელთა წინააღმდეგაც დღეს საქმე აღძრეს.
