თბილისის სააპელაციო სასამართლო ხვალ, ე.წ. ციანიდის საქმეზე მსჯავრდებული დეკანოზის, გიორგი მამალაძის საქმის განხილვას დაიწყებს. ხვალ მხარეები შესავალი სიტყვებით წარდგებიან.
როგორც „ჯი-ეიჩ-ენს“ დეკანოზის ადვოკატმა, პაატა მეხრიშვილმა განუცხადა, დაცვის მხარე სასამართლოს რამდენიმე შუამდგომლობით მიმართავს. ამის შემდეგ სასამართლო სააპელაციო საჩივრის განხილვაზე გადავა.
„ხვალ თბილისის სააპელაციო სასამართლო ჩვენი სააპელაციო სარჩელის საფუძველზე დეკანოზ გიორგი მამალაძის საქმის განხილვას იწყებს. საქმის განხილვის დაწყებამდე რამდენიმე სახის შუამდგომლობა გვექნება. მოგეხსენებათ, აღნიშნულ საქმესთან დაკავშირებით სახალხო დამცველმა სპეციალური ანგარიში მოამზადა. ამ ანგარიშის საფუძველზე დაცვის მხარე შუამდგომლობას დავაყენებთ, იმედია, სასამართლო ამ შუამდგომლობას დააკმაყოფილებს და ანგარიშს საქმეს დაურთავს.
ასევე, დაცვის მხარის ინიციატივით მივმართეთ სამართლის დოქტორს, ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტის პროფესორს, რომ „სასამართლოს მეგობარი“ მოემზადებინა. მან მეგობარი მოამზადა, როგორც პროცესუალური, ასევე მატერიალური სამართლებრივი საკითხების განმარტება გააკეთა მოცემულ საქმესთან დაკავშირებით და აღნიშნული თვითონვე წარადგინა სააპელაციო სასამართლოში. გვექნება შუამდგომლობა, რომ აღნიშნული წერილობითი მოსაზრების ავტორი სასამართლო სხდომაზე ზეპირად იქნეს მოწვეული.
იმედს ვიტოვებთ, რომ სასამართლო ობიექტურ, სწორ, სამართლიან, ადეკვატურ გადაწყვეტილებებს მიიღებს“, - აცხადებს მეხრიშვილი.
შეგახსენებთ, რომ თბილისის საქალაქო სასამართლომ 5 სექპემბერს, დეკანზ გიორგი მამალაძსე 9 წლით თავისუფლების აღკვეთა მიუსაჯა.
