მიხეილ სააკაშვილი კიევში, სახლის სახურავზე იმყოფება.
მის სახლთან და საცხოვრებელ ბინაში სპეცდანიშნულების რაზმი ჩხრეკას ატარებს. ადგილზე იმყოფებიან სააკაშვილის მხარდამჭერებიც და ადვოკატები, თუმცა მათ სპეცრაზმი ბინაში არ უშვებს.
სააკაშვილმა მხარდამჭერებს სახურავიდან მიმართა "მე სიცოცხლის ფასად მზად ვარ უკრაინისთვის ვიბრძოლო"- განაცხადა სააკაშვილმა.
უკრაინის უსაფრთხოების სამსახური, საქართველოს მესამე პრეზიდენტის და ოდესის ოლქის ყოფილი გუბერნატორის სახლთან სპეცრაზმის მობილიზების მიზეზებს განმარტავს. უწყებაში აცხადებენ, რომ გენერალური პროკურატურის ოპერატიული მუშაკები მიხეილ სააკაშვილის საცხოვრებელ ბინაში ჩხრეკას ატარებენ.
უწყების ცნობით, ჩხრეკა მიხეილ სააკაშვილის წინააღმდეგ დაწყებული სისხლის სამართლებრივი საქმის ფარგლებში მიმდინარეობს.
უკრაინული მედიის ცნობით სააკაშვილი სახლის სახურავიდან გადმოხტომით იმუქრება.
