საქართველო გამოწვევების წინაშე პარტნიორებთან ერთადაა და ეს იმის თქმის საფუძველს გვაძლევს, რომ უსაფრთხო ქვეყნად დარჩება, – ამის შესახებ ფრაქცია “ქართული ოცნების” თავმჯდომარემ მამუკა მდინარაძემ განაცხადა. მისი თქმით, სამწუხაროდ, ოპოზიცია თავის პოლიტიკურ კარიერას აგებს და ამ ორ ამბავს ერთმანეთისგან სპეციალურად არ მიჯნავს, რათა საზოგადოება შეცდომაში შევიდეს.
,,თუ გვინდა, რომ სიმართლეზე ვილაპარაკოთ, უნდა ვისაუბროთ იმაზე, თავის დროზე ჩატაევის გათავისუფლებას თუ დაკავებას, რა სამართლებრივი არგუმენტები ჰქონდა. მეორე ის ამბავია, რაც ბოლო დღეების განმავლობაში მოხდა. გამოძიება მიმდინარეობს, ქართული სახელმწიფო მოწოდების სიმაღლეზე დგას და კონკრეტულ კითხვებს პასუხები გაეცემა. არ შეიძლება, რომ კონკრეტულ რაიმე ვერსიაზე ვილაპარაკოთ. საქართველოს სახელმწიფო საზღვარი კარგადაა დაცული. საქართველო მსოფლიოს უსაფრთხო ქვეყნების სიაში ირიცხება და დარწმუნებული ვარ, ჩვენს ქვეყანას რესურსი ეყოფა და სამართალდამცავები კარგად მუშაობენ, შესაბამისად, საქართველო უსაფრთხო ქვეყნად დარჩება. უსაფრთხოების უზრუნველყოფის კონკრეტულ დეტალებზე პასუხებს შესაბამისი უწყებების ხელმძღვანელები გასცემენ”, – აღნიშნავს მდინარეძე.