ამ წუთებში, თბილისის საქალაქო სასამართლოში მიმდინარეობს ყოფილი პრეზიდენტის, მიხეილ სააკაშვილის წინააღმდეგ, სასამართლო პროცესი, რომელზეც მხარეები დასკვნითი სიტყვით წარდგებიან. მიხეილ სააკაშვილს სამსახურეობრივი უფლებამოსილების ბოროტად გამოყენებას ედავებიან. რაც, როგორც პროკურორმა, ირაკლი ნადარეიშვილმა აღნიშნა, იმ უკანონო შეპირებას მოიცავს, რომელიც სააკაშვილის მიერ გირგვლიანის საქმის არგახსნის, მასში მონაწილე ორგანიზატორების და შემკვეთების არმხილების და მართლმსაჯულების არაღსრულების კუთხით განხორციელდა.
თუ მოსამართლე გიორგი არევაძე გამამტყუნებელ განაჩენს გამოიტანს, სააკაშვილს 3-დან 5 წლამდე თავისუფლების აღკვეთა ემუქრება.
"ბრალდების მხარე დასკვნითი სიტყვით წარდგება, რომელშიც ყურადღება გამახვილებული იქნება ყველა იმ მტკიცებულებაზე, რომელიც სასამართლოზე გამოკვლეული იქნა, როგორც წერილობით, ისე მოწმეთა ჩვენებებით, ასევე ვიდეოსიუჟეტებზე, ბრიფინგებზე და ინტერვიუებზე, რომელიც ბრალდების მხარის მიერ იქნა წარმოდგენილი.
დღევანდელ სასამართლო სხდომაზე სრული მოცულობით იქნება მიმოხილული სასამართლო პროცესები, რომელმაც ეს 2 წელი მოიცვა. შესაბამისად, ბრალდების მხარე სასამართლოს თხოვნით მიმართავს, რომ ამ საქმეზე გამამტყუნებელი განაჩენი დადგეს. პროკურატურის მთავარი დასაყრდენია თითოეული მტკიცებულება, თითოეული მოწმის ჩვენება, თითოეული დოკუმენტი, თუნდაც შეწყალების აქტი, სტრასბურგის გადაწყვეტილება, რომელიც ბრალდების მხარის მიერ გამოკვლეულ იქნა", - განაცხადა პროკურორმა.