”12 დღის წინ, ცუდი ინციდენტი მოხდა, ეს იყო კონკრეტული ფაქტი, რომელიც სიტყვიერ მუქარაზე მეტი იყო. დღეს კი, სიცოცხლის მოსპობით დამემუქრნენ”, - განუცხადა ”ჯი-ეიჩ-ენს” დეკანოზ გიორგი მამალაძის ადვოკატმა, გიორგი ფანცულაიამ.
თუ რა სახის ინციდენტს ჰქონდა ადგილი, ადვოკატი გამოძიების ინტერესებიდან გამომდინარე არ საუბრობს.
”ამ ყველაფერმა ისეთი სახე მიიღო, მეტის მოთმენა აღარ ღირდა, ამიტომ პოლიციაში გამოვცხადდი, სადაც მითხრეს, რომ ჩემი საქმის მოკვლევა პროკურატურამ დაიწყო და იქ უნდა წავეყვანეთ. თბილისის პროკურატურას ძველ ფაქტზეც და ახალ ფაქტზეც სრული ინფორმაცია მივაწოდე.
ამ ეტაპზე გამოძიება დაწყებული არ არის, თბილისის პროკურატურაში ზოგადი მოკვლევაა დაწყებული. გასაუბრების ოქმი შეავსეს”, - აცხადებს ფანცუალაია.
ადვოკატი რამდენიმე დღის წინ მომხდარ ინციდენტსა და დღევანდელ მუქარას შორის კავშირს არ გამორიცხავს.
”ეს ორი რამ რამდენად კავშირშია ერთმანეთთან, გამოძიებამ უნდა დაადგინოს, ბრალმდებელი მე არ ვარ, რომ ვინმეს ბრალი წავუყენო. თუმცა, გამოძიება ვარაუდობს, რომ ეს ორი ფაქტი ერთმანეთთან კავშირშია, ჩემი ვარაუდები მეც მაქვს, მაგრამ ამ ყველაფრის გამოკვლევა გამოძიების და პროკურატურის საქმეა”, -აღნიშნა ადვოკატმა.
შეგახსენებთ, რომ გიორგი ფანცულაიამ დღეს სოციალურ ქსელში მუქარის შემცველი წერილი მიიღო. მას ინტერნეტმომხმარებელი სიცოცხლის ხელყოფით ემუქრებოდა.
