“გიორგი ფოფხაძე არის არა მარტო ჟურნალისტი, არამედ ადამიანის უფლებათა ცნობილი დამცველი", - ამის შესახებ "პატრიოტთა ალიანსის" ლიდერმა, ირმა ინაშვილმა ადამიანის უფლებათა კომიტეტის სხდომაზე, სახალხო დამცველის პოსტზე ფოფხაძის წარდგენისას განაცხადა.
ინაშვილის შეფასებით, გიორგი ფოფხაძემ მონაწილეობა მიიღო ყველა პოლიტიკურ პროცესში, რომელიც საქართველოში 90-იანი წლებიდან დღემდე განვითარდა.
"პოლიტიკურ პროცესებში მონაწილეობა გულისხმობს ჟურნალისტური ფუნქციის შესრულებას, ის აქტიურად აშუქებდა აფხაზეთის ომის ქრონიკებს ჩემთან ერთად, გიორგი ფოფხაძე არის ჟურნალისტი, რომელმაც გამოიარა ჭუბერის გზა და ასახა ის ტრაგედია, რაც ხდებოდა ჭუბერის გზაზე. ფოფხაძე იყო არაერთი მედიასაშუალების წარმომადგენელი ნატოსა და ევროკავშირში.
მას აქვს პირადი კონტაქტები ევროსტრუქტურების პირველ პირებთან, რაც ძალიან დაგვეხმარა მაშინ, როდესაც ქვეყანაში იყო სააკაშვილის რეჟიმი.
მე მინდა "ქართული ოცნების" იმ ბირთვს ვთხოვო გიორგი ფოფხაძის კანდიდატურის მხარდაჭერა, რომელიც ჩვენთან ერთად იბრძოდა სააკაშვილის რეჟიმის წინააღმდეგ. გიორგი ფოფხაძე არის პიროვნება, რომელსაც აქვს ყველა ის თვისება, რომელიც სჭირდება სახალხო დამცველს. მისი ბუნებიდან გამომდინარე, ის არ იქნება ერთი პარტიის სახალხო დამცველი. მე ღრმად ვარ დარწმუნებული, რომ ფოფხაძე იქნება საქართველოს სახელმწიფოებრივი ინტერესების დამცველი სახალხო დამცველი,”- განაცხადა ინაშვილმა.
აღსანიშნავია, რომ ფრაქცია “საქართველოს პატრიოტების” მიერ წარდგენილი სახალხო დამცველობის კანდიდატი გიორგი ფოფხაძე ადამიანის უფლებათა დაცვის კომიტეტს საქართველოში არყოფნის გამო ინტერნეტით ჩაერთო.
