,,ძალიან უცნაურია მელიასგან ამაზე საუბარი და ზოგადად ის ლოგიკა, რომ თუ თავისუფლებაში ხარ ან თუ ციხეს თავი დააღწიე ავტომატურად გარიგებული ხარ", - ამის შესახებ "ევროპული საქართველოს" წევრმა, ოთარ კახიძემ ნიკა მელიას ბრალდების საპასუხოდ განაცხადა.
კახიძის თქმით, სწორედ მელიაა ის, ვისი პირიდანაც ეს კომენტარი სასაცილოდ ჟღერს.
,,დღეს ჩვენ უნდა ვისაუბროთ ივანიშვილის ხელისუფლებაზე, მის პოლიტიკურ დაკვეთაზე და იმ სასამართლოზე, რომელიც ივანიშვილის ხელისუფლების დაკრულზე ცეკვავს. ეს უნდა იყოს ოპოზიციის მთავარი სამიზნე.
ამ შემთხვევაში ყურადღების გადატანა სხვა ოპოზიციურ პარტიებზე და ონიანის დაპატიმრების შიდაოპოზიციურ გარჩევის თემად ქცევა არის ერთი მხრივ, უპასუხისმგებლობა და მეორე მხრივ, სიბრიყვე.
რაც აწყობს ხელისუფლებას, ეს არის, რომ ვისაუბროთ არა ხელისუფლებაზე, არამედ "ნაციონალურ მოძრაობა"-"ევროპული საქართველოს" დაპირისპირებაზე.
ის ნამდვილად ბრალდებულია ხუთი წლის განმავლობაში. ის ციხეში არ მჯდარა და იმედია არც მოუწევს ჩაჯდომა. თუ დააღწევს თავს თავისუფლად ივანიშვილის მარწუხებს საერთაშორისო ზეწოლიდან გამომდინარე ან თუ ივანიშვილს არ მოუნდება ამ პოლიტიკური ფასის გადახდა მისი დაკავებით ეს იქნება მხოლოდ კარგი და ამაზე კი არ წამოაძახებს ევროპული საქართველო, რომ შენ რახან თავისუფლებაში ხარ გარიგდი, პირიქით ყველაფერს გააკეთებს, რომ კიდევ ერთი პოლიტიკური პატიმარი არ შეემატოს ივანიშვილის პირადი პატიმრის რიგებს.
ასეთი უპასუხისმგებლო განცხადებების გაკეთების ნაცვლად, აჯობებს, "ნაციონალური მოძრაობის" პოლიტსაბჭოს თავმჯდომარე დაკავდეს ივანიშვილის ხელისუფლებასთან ოპონირებით და მე ძალიან დიდ იმედს გამოვთქვამ, რომ მისი კოლეგები, "ნაციონალური მოძრაობიდან" ამ აბსოლუტურად სულელურ და ბრიყვულ ბრალდებას არ იზიარებენ,’’ - განაცხადა ოთარ კახიძემ.
შეგახსენებთ, ნიკა მელიას განცხადებით, გიორგი ონიანი "ევროპულ საქართველოში" რომ გადასულიყო, დღეს თავისუფალი იქნებოდა.
