პარლამენტის ჯანდაცვის კომიტეტის თავმჯდომარის, აკაკი ზოიძის განცხადებით, „ნაციონალური მოძრაობა“ აგრძელებს თეთრის შავად და კარგის ცუდად წარმოჩენას.
მისივე თქმით, ენმ-მ რეგიონებიდან ჩამოიყვანა საკუთარი პარტიის წევრები და მოახერხა 4-5 ათასი აქტივისტის მობილიზება.
„დიდი მზადების და „ნაციონალური მოძრაობის“ პროპაგანდისტული მანქანის მთელი დატვირთვით მუშაობის შემდეგ, მათ მთელი საქართველოს მასშტაბით გააკეთეს საკუთარი ამომრჩევლების მობილიზება, რეგიონებიდან ჩამოიყვანეს საკუთარი პარტიის წევრები და მოახერხეს 4-5 ათასი აქტივისტის მობილიზება.
ტყუილების პროპაგანდირების მიუხედავად, რა თქმა უნდა, საზოგადოება კარგად არჩევს მტყუან-მართალს, ცხადია, „ნაციონალური მოძრაობა“ და მარგინალური პოლიტიკური ჯგუფები უმცირესობაში დარჩებიან“,- განაცხადა აკაკი ზოიძემ.
ცნობისთვის, დღეს ენმ-ის აქცია რუსთაველის მეტროსთან დაიწყო და ბიძინა ივანიშვილის რეზიდენციასთან გაგრძელდა.
აქცია ამ დროსთვის დასრულებულია.
როგორც აქციის მონაწილეებმა განაცხადეს, პუშკინის სკვერისა და თაბორის მთის მიმდებარე ტერიტორიის ყოფილი პრემიერ-მინისტრის, ბიძინა ივანიშვილის კუთვნილი კომპანიისთვის გადაცემას აპროტესტებდნენ.
