აჭარის 2011 წლის ბიუჯეტში ყველაზე დიდი რაოდენობით თანხა აჭარის ავტონომიური რესპუბლიკის მთავრობისა და განათლების სამინისტროს შესანახად დაიხარჯება. აჭარის ფინანსთა და ეკონომიკის სამინისტროს ინფორმაციით, 2011 წლისათვის ბიუჯეტში მთავრობისათვის გასათვალისწინებელი ასიგნებების საორიენტაციო თანხა 29 მლნ. 864 ათას ლარს, ხოლო განათლების სამინისტროსათვის გასათვალისწინებელი თანხა 27 მლნ. 444 ათას ლარს შეადგენს.

2011 წლისთვის აჭარის მინისტრთა კაბინეტიდან ყველაზე მოკრძალებული ბიუჯეტი აჭარის სოფლის მეურნეობის სამინისტროს ექნება, რისთვისაც მომავალი წლის ბიუჯეტში საორიენტაციოდ 3 მლნ. 664 ათასი ლარის გათვალისწინებაა ნავარაუდევი. სამინისტროების გარდა, სახელმწიფო სტრუქტურებიდან 2011 წლისთვის ყველაზე მსუყე ლუკმა, როგორც ჩანს სსიპ "ბათუმის ბულვარს" ერგება, რისთვისაც დაახლოებით 8 მლნ. 200 ათასი ლარის გამოყოფაა გათვალისწინებული.

იმ ფონზე, როდესაც აჭარისა და ზოგადად ქვეყნის მთავარ პირიორიტეტად ტურიზმისა და ტურისტული ინფრასტრუქტურის განვითარებაა გამოცხადებული, 2011 წლისთვის აჭარის მთავრობა სსიპ "კურორტი ბეშუმისათვის" მხოლოდ 53 ათასი ლარის გამოყოფას აპირებს, რაც სახელმწიფო დოტაციაზე მყოფი საწარმოებისათვის გამოსაყოფ თანხებთან შედარებით, მიზერულია.