„საკრებულოს რომ შეხედავ, გეგონება რაღაც უტევს ჩვენს ქალაქს იმდენი პოლიციელია მობილიზებული“, - ამის შესახებ „ევროპული საქართველოს“ თბილისის მერობის კანდიდატმა ელენე ხოშტარიამ განაცხადა.
მისივე თქმით, ეს კანონდარღვევაა.
„საკრებულოს რომ შეხედავ, გეგონება რაღაც უტევს ჩვენს ქალაქს იმდენი პოლიციელია მობილიზებული, სინამდვილეში ხდება ის, რომ ბოლომდე უნდათ მიიყვანონ ბიძინა ივანიშვილის სურვილი , მიისაკუთროს ქალაქისთვის ძვირფასი ტერიტორია.
ისინი მიხვდნენ, რომ სუსტები არიან და ამიტომაც შეკრიბეს ამდენი პოლიციელია. ძალიან სამწუხაროა, რომ პოლიციელებს ამ დღეში აგდებენ.
ეს კანონდარღვევაა, ვინაიდან დეპუტატს პარლამენტის რეგლამენტით, მე-16 მუხლის თანახმად სათათბირო ხმის უფლებით სხდომაზე დასწრების უფლება აქვს. საკრებულოს თავმჯოდმარემ კი მიიღო გადაწყვეტილება, რომ დღევანდელ საკრებულოს სხდომას მხოლოდ საკრებულოს დეპუტატები და ჟურნალისტები დაესწრებიან“, - განაცხადა ხოშტარიამ.
დღეს საკრებულოს კომისიებისა და საკრებულოს სხდომაა დაგეგმილი, რომელზეც სხვადასხვა საკითხთან ერთად, ერთ-ერთი მთავარი საკითხი თაბორის მთაზე 5 ათასი კვადრატული მეტრისა და პუშკინის სკვერის მიმდებარედ 1900 კვადრატული მეტრის სტატუსშეცვლილი ტერიტორიების კონკრეტული კომპანიებისთვის გადაცემაზე უნდა იმსჯელონ.
ცვლილებებს ოპოზიცია აპროტესტებს.
